Superliga. Turni ochib beruvchi markaziy bahs haqida

Xabaringiz bor, bugunda Superligada 17-tur bahslari start oladi. Turni markaziy o‘yin ochib beradi. "Paxtakor" "Jar"da OKMK bilan o‘ynaydi. 

Birinchi o‘yindanoq biz keyingi kunlarga qo‘yilgan 3 talab uchrashuvlarning o‘rnini bosuvchi markaziy bahsning guvohi bo‘lishimiz mumkin.

Olmaliq klubi ikkinchi davrani ishonchli g‘alaba bilan boshlab oldi. Yangi xaridlardan faqat himoyachi Ibrohim Yo‘ldoshev asosiy tarkibda tushdi va ishonchli harakat qildi. Bundan tashqari, legionerlar ham yaxshi o‘yin o‘tkazishgani e’tiborga molik. Aynan Ruben Sanches va Naoki Senaganing gollari 2-0 hisobidagi g‘alabani ta’minladi. Eng qizig‘i bu gollar ikki futbolchi uchun ham bu mavsum Superligadagi "pochin" gol bo‘ldi. Bu holatdan ko‘rinib turibdiki, jamoa ikkinchi davraga yaxshi tayyorlana olgan va oldiga yuqori ambitsiyani qo‘ygan. 

"Paxtakor" ham tanaffusdan keyingi bahsda muvaffaqiyatga erishdi. G‘uzorda o‘tgan bahsda "Mash’al" 0-1 hisobida mag‘lub  etildi. Hisob kichik bo‘lsada, o‘yin to‘liq "sherlar"ning ustunligida o‘tganini ham aytib o‘tish joiz. Tanaffusga yuqori tempda yo‘l olgan poytaxt klubi ikkinchi davrani ham shu tempda boshlagani quvonarli holat.

Bu chempionlik kurashiga ijobiy ta’sir ko‘rsatadi. Chempionlik kurashining yuqoriligi esa chempionatga bo‘lgan qiziqishni oshiradi. Debyutantlardan Aziz Turg‘unboev va iroqlik Zayid Tahsin boshlang‘ich tarkibga kiritilgan ersa, Hojimat Erkinov hamda Bobir Abdixoliqov zahiradan o‘yinga qo‘shildi. Jamoadagi muallaqlik bartaraf etilgani ham ichki muhitga ijobiy ta’sir qilgani aniq.  Tarkib ham ancha normal ko‘rinishga kelib qoldi. Ikki milliy jamoa futbolchisining zahiradan tushayotgani ham buni ko‘rsatib turibdi.

Tahminlarga o‘tsak, ikki jamoa ham bu bahsga yaxshi formada kelayotgani, tarkib darajasi ham bir-biriga yaqinligidan kelib chiqqan holda imkoniyatlarni 50/50, deya baholasak bo‘ladi.

Yahyoxon G‘aniev