Суперлигада мухлислик бўйича бу клубга тенг келадигани йўқ!

2024 йилги чемпионат ўзининг бир қанча муҳим воқеликлари билан ёдда қолди. Булардан бири мухлислар билан боғлиқ. “Андижон” клуби ишқибозлари жорий йилги мавсумда яна олдинга катта қадам ташлашди. Севимли жамоасини қўллаб-қувватлашда янгидан-янги перформанслар, ўзгача тарздаги олқишлаш усулларини жорий қилдилар. Ўзбекистонда ягона эканлигини яна бир карра исботлади. “Бобур арена”даги ҳар бир ўйин аншлаг, фантастик муҳитда ўтди.

Шубҳасиз, “Андижон” мухлислик борасида ҳам жуда фаол бўлди. “Бобур арена”да энг кўп мухлис 8-турдаги ўйинда тўпланди. “Андижон”нинг уйида “Металлург”га қарши учрашувини стадионда 19095 нафар ишқибоз кузатиб борди.

Эътиборлиси, ушбу чемпионатда “Андижон”нинг “Бобур арена”да ўтказган жами 16 та ўйинидан 11 тасида 10 минг зиёд ишқибозлар келган. Энг оз мухлислар ташрифи ҳам 5000 мингдан кам эмас. Яъни, бу 24-турда “Андижон” – “Қизилқум” баҳсида кузатилди 5442. Лекин ушбу рақам айрим бошқа клубларнинг ўз майдонидаги бир учрашувида энг кўп келган томошабинлар сонидан ҳам кўп.

Бундан ташқари, меҳмондаги учрашувларда ҳам андижонлик ишқибозлар жамоани ёлғизлатиб қўймадилар. Масалан, чемпионат доирасида Фарғонада “Нефтчи”га қарши баҳсда 5000 мингдан зиёд андижонлик мухлислар жамоани қўллаб-қувватладилар. Ўзбекистон Кубоги финалида “Истиқлол” стадионига 20 минг мухлис келди. Унинг ярмидан кўпини эса андижонлик ишқибозлар ташкил қилди.

Томошабинлар ташрифи

Суперлига

2-тур. “Андижон” – “Бунёдкор” – 5:1. 10140 томошабин

4-тур. “Андижон” – “Насаф” – 1:1. 14861 томошабин

6-тур. “Андижон” – “Сўғдиёна” – 0:1. 18012 томошабин

8-тур. “Андижон” – “Металлург” – 1:1. 19095 томошабин

10-тур. “Андижон” – “Пахтакор” – 1:3. 17152 томошабин

13-тур. “Андижон” – “Навбаҳор” – 3:0. 17873 томошабин

14-тур. “Андижон” – ОКМК – 2:3. 13520 томошабин

16-тур. “Андижон” – “Сурхон” – 2:3. 7852 томошабин

18-тур. “Андижон” – “Локомотив” – 1:2. 9762 томошабин

20-тур. “Андижон” – “Нефтчи” – 0:0. 13262 томошабин

22-тур. “Андижон” – “Олимпик” - 1:0. 8411 томошабин

24-тур. “Андижон” – “Қизилқум” – 0:0. 5442 томошабин

25-тур. “Андижон” – “Динамо” – 3:0. 5845 томошабин.

Ўзбекистон Кубоги

1-тур. “Андижон” – “Динамо” – 2:2. 15110 томошабин

3-тур. “Андижон” – “Насаф” – 1:0. 12480 томошабин

1\2 финал. “Андижон” – “Сурхон” – 0:0. Пен.б: 5:4. 15643 томошабин

Жами: 204460

Ҳа, бу йил “Бобур арена”да ҳаммаси бўлиб йил давомида 204460 нафар мухлис “Андижон” иштирокидаги учрашувларни кузатган ва қўллаб-қувватлаган. Ўртача ҳар бир ўйинга 12778 тадан тўғри келади. Бу жуда яхши кўрсаткич. Шунингдек, ўз уйида мухлис йиғиш борасида “Андижон” мутлақ етакчи. Суперлигадаги ҳеч бир жамоа бу йилги мавсумда ўз майдонида 200 000 мингдан ортиқ мухлисни йиға олгани йўқ.