Суперлигага йўлланма олган "Турон" яна тўрт нафар футболчи билан келишувга эришди

Ўтган мавсум якунларига кўра Суперлига йўлланмасини қўлга киритган "Турон" жамоаси бугундан Қўқон шаҳрида йиғилиб, янги мавсумга тайёргарликни бошлади. Хабарингиз бор, "Турон" бугунга қадар бир қатор трансферларга қўл урди. Хусусан, тожикистонлик ярим ҳимоячи Умаржон Шарипов ("Хатлон", Тожикистон), Даврон Умиров ("Локомотив"), Музаффар Музаффаров ("Қўқон-1912"), Абдуқаҳҳор Ҳожиакбаров ("Сурхон", Иброҳим Йўлдошев ("Сурхон") билан расман келишувга эришилди.

Шу ўринда айтиб ўтиш жоиз, клуб томонидан амалга оширилган трансферлар борасида ижтимоий тармоқларда баъзи тушунмовчиликлар юзага келмоқда. Мазкур масалага ойдинлик киритиш мақсадида жамоа матбуот хизмати бош мураббий Исломбек Исмоилов билан кичик сухбат уюштирди.

"Ҳозирда "Турон" томонидан амалга оширилаётган трансферлар бўйича ижтимоий тармоқларда тушунмовчилик холатлари мавжуд. Биласизми, жамоамиз ҳар доим ўз олдига юқори мақсадларни қўйиб келади. Биз Суперлигада ҳам фақат юқори ўринлар учун курашмоқчимиз. Шу сабабдан таркибимизга бир қатор тажрибали футболчиларни жалб этмоқдамиз.

Ўтган мавсумда айтилган фикрлар, яъни жамоани Суперлигага олиб чиққан таркиб сақланиб қолиниши режамизнинг бир қисми. Ўша таркибдаги футболчилар жамоамизда сақлаб қолинган. Айтиш мумкинки, бугунга қадар ўтган мавсумда таркибимизда ҳаракат қилган 3 нафар футболчилар, Шукурали Пўлатов, Отабек Ҳайдаров ва Шохрух Холматовлар ўз ҳоҳишларига кўра жамоамизни тарк этишди.

Шунга ойдинлик киритиш лозим, ўтган мавсумда Про лигада жамоамиз таркибида 21 нафар футболчи ҳаракат қилган. Бундан ташқари аксарият футболчиларимиз жуда ёш эди, шу боис уларга ҳам кўпроқ ўйин амалиёти бериш мақсадида U-21 жамоасига ўтказилди. Шуларни ҳисобига асосий жамоамизда жами 15 нафар футболчи қолган эди. Суперлигада асосий жамоада 25 нафардан иборат футболчилар рўйҳатдан ўтказилиши керак. Айни дамда бизда яна 10 нафар футболчининг ўрни бўш эди, шундан келиб чиқиб бир қатор Суперлига ҳавосини олган тажрибали футболчиларни таркибга жалб қилдик.

Ҳозирга қадар эълон қилинган трансферлардан ташқари яна 4 нафар Суперлигада ўйнаган футболчилар билан ҳам келишувга эришганмиз, бу ҳақида яқин кунларда расман эълон қилинади. Клубимизда амалга оширилаётган ишлар аниқ режа ва дастур асосида ташкил этилмоқда", - деди Исмоилов.