Супертўпурарни оладиган борми?

Сўнгги йилларда “Бавария”нинг муваффақиятларига ўз голлари билан катта ҳисса қўшиб келаётган Роберт Левандовски ёзда трансферлар учун очиқ бўлади. Мюнхен клуби ҳам аниқ таклифлар бўлса, польшалик ҳужумчини қўйиб юборишга тайёрлигини маълум қилган.

Левандовскининг бугунги кундаги трансфер суммаси 60 миллион еврога баҳоланмоқда.

Футболчининг ўзи келажаги ҳақидаги саволларга қуйидагича жавоб берди.

- Келажагим ҳақида нима дейишим мумкин? Мен ҳамма нарсага тайёрман. Ҳозир “Бавария”да ўзимни жуда яхши ҳис қиляпман. Менга шаҳар ҳам, клуб ҳам ёқади. Шунингдек, янги маданият ва тилни ўрганишга қарши эмасман ва буни яхши кўраман. Лекин бундай имконият футболдаги фаолиятим давомида бўладими ёки кейинми, бунисини билмайман, - деди Левандовски.

Роберт Левандовски якунланган мавсумда “Бавария” таркибида 40 та учрашувда майдонга тушиб, 48 та гол урди ва Европа миллий чемпионатларининг энг зўр тўпурарига бериладиган “Олтин бутса” танловида ғолиб чиқди.