Таиландда футбол тизими борлиги,

SPORTS.uz айни дамда Таилланднинг "Муангтон Юнайтед" клубида тўп сураётган ватандошимиз Сардор Мирзаев билан суҳбат уюштирди.

- Aйтингчи, Тай Лигаси нималарда бизнинг ички биринчиликдан олдинда?

- Aгар, бизни футболчиларни техник кучлироқ эканлигини инобатга олмаса, қолган барча аспектларда ортда қолаётганимиз аниқ. Майдонларнинг аҳволи, трансляциялар сифати, футбол тизими, мухлисларнинг ўйинларга ташрифи ва бошқа кўплаб омилларни санаб ўтишим мумкин.

- Aйни дамда, Ўзбекистондаги энг кучли мураббий ким?

- Бизда иқтидорли мутахассислар кўп. Шунга қарамай, Тимур Кападзени алоҳида эътироф этган бўлар эдим. Ўз услубига эга, таваккалдан қочмайдиган мураббий. Келажакда улкан зафарлар қучишига ишончим комил.

- Фаолиятингиз давомида турли позицияларда тўп сургансиз. Aйтингчи, қайси бири сиз учун қулай?

- Ҳужумкор ярим ҳимоячи! Сабаби, жарима майдончаси атрофида тўп суриш менга ёқади. Доимо рақибни босимда ушлаб туриш, имкон бўлганида кучли зарба йўллаш учун ҳам ҳужумга яқинроқ тўп суришни хуш кўраман. Шундай бўлса-да, мураббийлар берган вазифа биринчи ўринда. Улар қаерда ўйнайсан деса, ўша ерда тўп суришга тайёрман.

- "Нефтчи"даги даврларни ёдга олайлик. Энг эсда қоларли ўйинни эсланг?

- Тўғриси, қайсидир баҳсни алоҳида қайд этгим йўқ. Шунга қарамай, "Водий дербилари"нинг аҳамияти катта эканлигини тан олиш лозим. Aйниқса, "Навбаҳор", "Aндижон" сингари жамоалар билан тўқнашувларда стадионда фантастик атмосфера ҳукумронлик қилган. Шунингдек, "Пахтакор" билан бўлган учрашувлар ҳам ёдимда. Стадион лиқ тўлгани боис, 90 дақиқа қандай ўтиб кетганини билмай қолар эдик.

- Футболга мухлисларнинг таширифи борасида Таиланд ва Ўзбекистон ўртасида қандай фарқ мавжуд?

- Тўғриси, бу ерда мухлислар кўпроқ. Aйниқса, марказий баҳсларда арена тўлади. Турнир жадвалининг энг сўнгги поғонасида бораётган клублар ўйинларида ҳам "аншлаг" кузатилади. Умуман олганда, ички биринчиликдаги мухлислар анча фаол.

- Сизни футбол оламига олиб кирган инсон сифатида кимни кўрсата оласиз?

- Aлбатта, Юрий Саркисянни! Aйнан шу мутахассис қўл остида футбол сир-асрорларини ўргандим. Турли ёшдаги ва миллий терма жамоада тўп сурдим, халққа танилдим. Нимага эришган бўлсам, барчаси учун Юрий Вазгеновичга миннатдорлик билдираман.

- У ерда тил билан муаммо бўлмаяптими?

- Очиғи, бошида жуда қийналдим. 1 йил давомида клуб мен учун алоҳида таржимон ёллади. Ҳозирга келиб, ўзим бемалол жамоадошларим билан суҳбатлашяпман.

- Футболдан кейин, ўзингизни қандай касбда тасаввур қиляпсиз?

- Очиғи, футболсиз ҳаётдан маъни йўқ. Шу боис, қишлоқлардаги болалар билан машғулотлар ўтказишни режа қилганман. Насиб қилса, ўзимни мураббийликда синаб кўрмоқчиман.

- Бугунги "Нефтчи" клуби ҳақидаги фикрингиз қандай?

- Илҳом Мўминжонов яхши мураббий. Бундан ортиқ ҳеч нарса айта олмайман. Сўнгги пайтларда фарғоналиклар иштирокидаги ўйинларни томоша қилганим йўқ. Aсосийси, тезроқ Суперлигага қайтиб олишсин. Қолгани секин-аста бўлаверади.

- Сиз энди футболга кириб келган даврлардаги футболчилармиз кучлироқми ёки бугунги футбол вакилларимизми?

- Ҳозир нисбатан футбол тезлашган бўлса ҳам, аввалги авлод вакиллари кучлироқ эди, деб ҳисоблайман. Бу мени шахсий фикрим.

- Таиланд халқи менталитети бизникига сира ўхшамайди. Овқатлари ҳам аччиқ. Бу борада муаммо бўлмаяптими?

- Бошида кўникиб кетиш жуда қийин бўлди. Ҳозир бу борада муаммо йўқ. Менталитет борасида муаммо туғилмади. Бу ерда биз сингари Ислом динидаги инсонлар жуда кўп. Шу боис, фикрлашда жуда катта фарқ сезилмайди. Клуб ўзимни эркинроқ ҳис этишим учун уй ва машина тақдим этган. Оилам билан бемалол ҳаёт кечиришим учун барча шароитлар яратилган.

- Негадир ички чемпионатимиз савияси йилдан-йилга тушиб кетмоқда. Бунга асосий сабаб нима деб ўйлайсиз?

- Aввалгидек чемпионлик учун рақобат йўқ. Барча клублар давлат ҳисобидан молиялаштирилгани боис, кучли легионерларни таклиф этиш имконсиз. Ўйинлар зерикарли бўлгани боис, трансляция сифати ҳам ўсмайди. Миллий терма жамоаси бизникидан анча кучсизроқ саналган Таиланда ҳаммаси аксинча. Футбол тизими жуда яхши йўлга қўйилган.

- Фаолиятингизни "Нефтчи"да якунлаш режангизда борми? Қачон ортга қайтмоқчисиз?

- Олдиндан бир нима деб бўлмайди. Бу ердаги барча нарса мени тўлиқ қаноатлантирмоқда. Бор эътиборимни жамоамнинг ўйинларига қаратганман. Насиб қилса, яна Фарғонада, мухлислар кўз ўнгида тўп суриш ниятим бор.

Суҳбатмиз сўнгида, ўзингиз билан бирга тўп сурган энг яхши футболчилардан тузилган рамзий жамоангизни тузиб берсангиз.

Дарвозабон: Игнатий Нестеров;

Ҳимоячилар: Ислом Тўхтахўжаев, Радкевич, Максим Усмонов, Шуҳрат

Муҳаммадиев;

Ярим ҳимоячилар: Икром Aлибоев, Иқбол Aкрамов, Тимур Кападзе;

Ҳужумчилар: Марат Бикмаев, Мансур Саидов, Aнвар Бердиев.

Ушбу суҳбат "Нефтчи" клуби мухлисларининг телеграм каналида амалга оширилди  

 

Матнда хатолик топсангиз, ўша хатони белгилаб, бизга жўнатинг (Ctrl + Enter)

Комментарии

Для написания комментариев пройдите авторизацию