"Таклифни эшитиб хурсанд бўлдим" - ЖЧ иштирокчиси Рустам Турдимуродов янги жамоаси ҳақида

“Андижон”нинг жорий йилги трансфер сиёсати иқтидорли, келажаги бор бўлган ўйинчиларни жалб этишга ҳам қаратилган ва селекцияда ушбу жиҳатга ҳам алоҳида эътибор қаратилди.

Бунга мисол тариқасида Рустам Турдимуродовни тилга олиш мумкин. Ўтган йили Беларуснинг “Энергетик-БГУ” жамоасида тўп сурган ҳужумчи “Пахтакор” клуби тарбияланувчиси ҳисобланади. Қолаверса, у ўтган йили Аргентинада ўтган U20 жаҳон чемпионатида ҳам терма жамоамиз шарафини ҳимоя қилди. Бу эса унинг иқтидоридан дарак.

Ҳозирда 19 ёшда, бир неча ойдан сўнг 20 ёшни қаршилайди. Тиришқоқ ва меҳнаткаш футболчининг фаолиятида энди янги саҳифа очилмоқда. Турдимуродовни “Андижон”да ўз сўзини айтишига ишонамиз. Футболчи эса клуб матбуот хизматига ўзи ва янги мақсадлари ҳақида гапирди.

- Рустам "Андижон" клубига хуш келибсиз! Аввало, футболга кириб келишингиз қандай юз берган, ким сабабчи бўлган?

- Авваламбор, Андижон аҳлига ва жамоа мухлисларига Ассаламу алайкум! Футболга кириб келишимга оилам, кўпроқ дадам сабабчи бўлган. Дадам профессионал футболчи бўлишни истаган, лекин бу насиб қилмаган. Шунинг учун мени футболчи бўлишимни истаганлар.

- Фаолиятингизнинг бошланиши қандай юз берган?

- Биринчи мураббийим (Раҳматли - Сарвар ака Шарипов, укаси Шерзод ака Шарипов) ёрдамида “Пахтакор” академиясига ўтдим. У ерда Олим ака Шокиров тарбиясини олдим. Айнан Олим ака Шокиров ёрдамида “Пахтакор” U19, U21 ва асосий таркибга чиқдим .

- "Андижон" жамоасига кўчиб ўтдингиз. Бу таклифни илк бор эшитганингизда қандай реакция билдирдингиз?

- Реакция ажойиб ва ижобий тарзда бўлди. Ўзим ҳам таклифни эшитиб, хурсанд бўлдим.

- “Андижон”да ўз олдингизга қандай мақсад қўйдингиз?

- Албатта, жамоамга ёрдам бериш. Бунинг учун бор имкониятимни ишга соламан.

- Ҳужумчи сифатида нечта гол уришни мўлжаллаяпсиз?

- Ҳали Суперлигада дебют голимни урмадим. Аммо “Андижон”да голлар уриб мухлисларнинг қалбидан жой олмоқчиман. Худо хоҳласа, қанча имконят бўлса, шундан фойдаланиб, кўпроқ гол уришга ҳаракат қиламан.