Таниқли журналист "Барса"га Альваресни олиш йўлини ўргатди

"Атлетико" ҳужумчиси Хулиан Альвареснинг "Барселона"га ўтиши ҳақидаги хабарлар ҳануз тингани йўқ.

Маълумотларга кўра, аргентиналик футболчи аллақачон клуб раҳбариятига жамоани тарк этиш истагини билдирган. Унинг асосий варианти сифатида айнан "Барселона"ни кўраётгани айтилмоқда.

- Агар "Барселона" Альварес учун Гризманнга таклиф қилинганидан ҳам кўпроқ – тахминан 120–150 миллион евро атрофида маблағ таклиф қилса, "Атлетико" бу вариантни жиддий кўриб чиқади, деб ўйлайман. Хулианнинг Диего Симеоне билан муносабатлари унчалик яхши эмас. Бошқача гапираётганлар ҳам бор, лекин менинг ишончли манбаларим бор ва ўз фикримда қатъий қоламан. Назаримда, Альвареснинг ўзи жамоат олдига чиқиб, келажак борасидаги режалари ҳақида очиқ гапириши керак, – дея таъкидлаган машҳур инсайдер Маттео Моретто.

Эслатиб ўтамиз, яқинда "Атлетико" 26 ёшли форвард бўйича "Реал" томонидан келиб тушган таклифни рад этган эди. Мадрид клуби футболчи учун 150 миллион евро таклиф қилгани хабар қилинган.