Taniqli kinorejissyor engilmas bokschilarimiz haqida film suratga oladi

"O‘zbek bokschilarining olamshumul muvaffaqiyatlari, yutuqlari haqida ko‘p gapirdik, she’rlar bitdik, suratlar chizdik. Endi qahramonlarimiz haqida motivatsion filmlar suratga olish navbati keldi", - deyiladi Milliy olimpiya qo‘mitasi rasmiy saytidagi xabarda.

Ayni paytda “O‘zbekkino” milliy agentligi tomonidan "Rio-2016" yozgi Olimpiya o‘yinlarida qahramonlik ko‘rsatgan bokschilarimiz haqida “Engilmas” (ishchi nomi) nomli kinofilmini tasvirga olish ustida ish olib borilmoqda. Filmning stsenariy va syujetlarini boyitish, tajribali mutaxassislarning fikrini o‘rganish maqsadida hozirda Rossiyada faoliyat olib borayotgan hamyurtimiz, rejissyor va prodyuser Jahongir (Djanik) Fayziev bilan uchrashuv bo‘lib o‘tdi. MOQda o‘tkazilgan ushbu tadbirda Qo‘mita raisi Rustam Shoabdurahmonov, Bosh kotib Oybek Kasimov, “O‘zbekkino” MA direktori Firdavs Abduxoliqov, Rossiyaning «KIT» kinostudiyasi bosh direktori, rejissyor va prodyuser Jahongir Fayziev hamda bo‘lajak kino ustida ish olib borayotgan ijodkorlar ishtirok etishdi.

“Sizni yurtimizda yana bir bor ko‘rib turganimizdan mamnunmiz. Sizning aktyorlik paytdagi rollaringizni juda yaxshi eslaymiz. Qolaversa, hamyurtimizning xorijda madaniy-ma’rifiy sohalarda ulkan yutuqlarga erishayotgani bizga g‘urur bag‘ishlaydi. Muhtaram Yurtboshimiz boshchiligida olib borilayotgan sog‘lom turmush tarzi targ‘ibotini hamkorlikda davom ettirish biz uchun sharaf. Yaqinda efirga uzatilishi kutilayotgan “Mendirman Jaloliddin” tarixiy serialidan so‘ng sportga oid yuqori saviyadagi filmni xalqimizga taqdim qilish ayni muddao bo‘lar edi”, – dedi Rustam Shoabdurahmonov.

O‘z navbatida Jahongir Fayziev ham bu boradagi fikr va mulohazalari bilan o‘rtoqlashdi.

“Har ikkimizning maqsadimiz bir. Siz insonda sog‘lom tana, biz esa sog‘lom ruh bo‘lishini istaymiz. Hozir butun dunyoda sport sohasidagi filmlarni suratga olish urfga kirib bormoqda. Boisi bunday targ‘ibot o‘zining samarasini berib kelmoqda. Bizning har sohada boy tariximiz bor. Yoshlik paytimizda ham Rufat Risqievning g‘alabalarini yaxshi eslaymiz. Hozir ham o‘zbek bokschilarining dovrug‘i dunyoga mashhur. Endi buni xalqimiz uchun etkazib berishimiz lozim”, – dedi Jahongir Fayziev.

Suhbat davomida Firdavs Abduholiqov va boshqa mutasaddilar bo‘lajak kino haqida o‘z fikr va takliflarini aytib o‘tishdi. Yakunda tomonlar o‘zaro hamkorlikka tayyor ekanliklarini bildirishib, tez orada bu boradagi navbatdagi qadamni tashlashga kelishib olishdi.