Тчуамени битта шарт билан "Манчестер Юнайтед"га ўтишга рози

Мадриднинг «Реал» клуби ярим ҳимоячиси Орельен Тчуамени ёзда «Манчестер Юнайтед» сафига ўтиш вариантини кўриб чиқишга тайёр. Бироқ бу фақат битта шарт бажарилган тақдирда амалга ошиши мумкин.

Журналист Дин Джонс маълумотига кўра, француз футболчиси «Олд Траффорд»га йўл олишга шундагина рози бўлади: агар «Реал» раҳбарияти унга очиқ-ойдин тарзда эндиликда унга асосий ўйинчи сифатида ишонмаслигини билдирса.

«Биздаги маълумотларга кўра, агар унга „Реал“да керак эмаслиги айтилса, футболчи „Манчестер Юнайтед“га ўтиш имкониятини кўриб чиқишга тайёр», — дея таъкидлаган Джонс.

Аввалроқ машҳур инсайдер Фабрицио Романо Тчуамени «Манчестер Юнайтед» учун ёзги трансфер ойнасидаги устувор номзодлардан бири эканини маълум қилган эди. У «Борнмут» ярим ҳимоячиси Алекс Скотт билан бир қаторда манкуниянлар рўйхатида юқори ўринни эгаллаб турибди.

Шу билан бирга, Романо таъкидлашича, битимнинг амалга ошишига ҳозирча икки асосий омил тўсқинлик қилмоқда: француз футболчисининг юқори маоши ва мадридликлар жамоанинг етакчи ўйинчиларидан бири билан хайрлашишни истамаслиги.

Шунга қарамай, вазият ўзгариши мумкин. Дензел Дюмфрис, Ибраима Конате, Марк Кукурелья ва Бернарду Силва каби футболчиларни сотиб олгандан сўнг «Реал» таркиби жуда ҳам кенгайиб кетди. Клуб трансфер бозорида фаоллигини давом эттириш учун маълум миқдорда ўйинчиларни сотишига тўғри келади.

Мадрид клубида энди 26 ёшли ярим ҳимоячини сотиш эҳтимоли ҳам кўриб чиқилмоқда. Агар «Манчестер Юнайтед» ва клубнинг INEOS компаниясига тегишли эгалари томонидан ҳақиқатан ҳам жиддий таклиф тушса, «Реал» уни кўриб чиқишга тайёр экани айтилмоқда.