Темур Кападзе: Қатарда Почеттинодан ташқари яна кўплаб машҳур инсонларни учратиш мумкин эди

Хабарингиз бор, яқинда Ўзбекистон U-19 терма жамоасига Темур Кападзе бош мураббий этиб тайинланган. Айтиш мумкинки, Кападзе хизмат сафари билан Қатарда бўлиб қайтди. У билан бирга шунингдек, Осиёнинг икки карра энг яхши футболчиси Север Жепаров ҳамда Ўзбекистон футбол ассоциациясининг мутахассислари ҳамрохлик қилишди. Қизиқ, вакилларимиз у ерга айна нима мақсадда боришган? Кападзе эса бунинг сабабини очиқлади.

- Бизни Ўзбекистон футбол ассоциациясидан юборишди ва у ерга делегация бўлиб бордик. Биласиз, Қатардаги «Эспайр» академияси Осиёдаги энг яхшиларидан бири ҳисобланади. У ерда ишлар қандай йўлга қўйилган, селекция тизими қанақа йўлга қўйилган, қолаверса, академияни битиргач, қаерга кетишяпти, биз икир-чикиригача майда деталларигача ўрганиб чиқяпмиз. Академиядаги шароит ва имкониятларни кўриб, фақат ҳавас қилиш мумкин. Футболни ривожлантириш учун ҳамма нарса бор. Қолаверса, у ерда яхши мутахассислар ишлар экан. Мураббийлар ва скаутлар билан ҳам гаплашиб, ўз соҳаси бўйича олиб борилаётган ишлари юзасидан гаплашдик. Чунки бу биз учун қизиқ эди. Ўзимиз учун кўп янгиликларни эшитдик.

Яна бир эътиборга молик жиҳати шундаки, Темур Кападзе ва унинг ҳамрохлари топ-савиядаги мутахассис, яқинда «Тоттенхэм» бош мураббийлигини тарк этган Маурисио Почеттино билан ҳам учрашдилар. Терма жамоамиз устози эса ушбу учрашув қандай юз берганига ойдинлик киритди.

- Маурисио Почеттино билан учрашувимизга келсак, ФИФА ҳамда ОФК томонидан катта зиёфат уюштирилди. У билан ўша ерда танишиб қолдик. Нафақат Почеттино, балки таниқли бўлган собиқ футболчилар ва яна машҳур мураббийларни ҳам учратиш мумкин эди. Почеттино билан бироз суҳбатлашдик. Унинг «Тоттенхэм»да олиб борган ишларини билардик. Унга ўзимизни қизиқтирган саволларимиз билан мурожаат қилдик.

Шунингдек, Қатарда клублар ўртасидаги жаҳон чемпионати бўлиб ўтди. Ушбу мусобақага ҳам қизиқиш катта эди. Ҳамюртларимизнинг Қатар ташрифи давомида эса табиийки, ушбу нуфузли мусобақанинг ўйинларини бевосита стадиондан кузатиш имконига эга бўлишди. Айниқса, «Ливерпуль» ижросидаги ўйинларни кузатиш мароқли бўлса керак.

- Тўғриси, «Ливерпуль» жамоаси билан яқиндан танишиш имконияти бўлмади. Ҳаттоки, машғулотига ҳам қўйишмайди. Нафақат бизда, балки бошқаларда ҳам бундай имконият бўлмади. Албатта, клублар ўртасидаги ўйинларни ҳам бевосита стадионда кўриб, таҳлил қилдик. «Ал Садд»нинг 5-ўрин учун Тунис жамоаси билан ўтказган ўйинини кўрдик. «Ал Ҳилол» - «Фламенго» ўртасидаги учрашувни, шунингдек, «Ливерпуль»нинг ярим финал ҳамда финалдаги ўйинларини томоша қилдик. Бундай юқори даражадаги беллашувларни стадиондан кузатиш эса биз учун жуда фойдали. Чунки майдонда бутун жамоанинг ҳаракати кўриниб туради. Барибир телевизорда томоша қилганингизда ўйиннинг умумий картинкаси кўринмайди. Масалан, ҳужум уюштирилганида ҳимоячилар нима қилишаётгани, қаерда туришгани ва яна шу каби ҳолатларга эътибор қаратдик. Ташкилотчилар бизга ўйинлар учун чипталарни етказиб туришди. Биз ўйинларни оддий мухлис сифатида эмас, балки мутахассис тариқасида кўриб, ўзимиз учун керакли хулосаларни чиқардик, - деди Кападзе.

Шу ўринда Кападзе ва унинг дўстлари клублар ўртасидаги финални ҳам бевосита жонли равишда томоша қилишди. Ўзбекистон ёшлар терма жамоаси устозининг «Ливерпуль» ҳамда «Фламенго» ўртасидаги ўйин ҳақидаги таассуротлари қуйидагича бўлди:

- Финалга келадиган бўлсак, стадиондаги муҳит жуда ёқимли кўринишда эди. Айниқса, у ерда Бразилиядан келган мухлислар жуда кўп эди. Балки Қатарнинг ўзида ҳам бразилияликлар кўпроқ бўлса керак. Стадионда деярли 70 фоиз бразилиялик мухлислар эди ва улар тинмасдан «Фламенго»ни қўллаб-қувватлашди. Аммо Англиядан ишқибозлар у қадар кўп эмасди. Асосан бошқа яқин араб давлатларидан келган «Ливерпуль»нинг мухлисларини айтиш мумкин холос. Албатта, учрашув қизиқ ўтди. Гарчи «Ливерпуль» ютган бўлса-да, лекин уларга қараганда «Фламенго» яхшироқ ўйнади. Тўпни назорат қилиш ва хавфли вазиятларни яратишда ҳам бразилияликлар устун эди. Негадир Клопп жамоаси ўз ўйинини кўрсата олмади. Аммо «Ливерпуль» барибир «Ливерпуль»-да. Уларда тажрибали ўйинчилар кўплиги боис охир-оқибат ғалабани таъминлай олишди. Айниқса, индивидуал маҳорат қўл келди.