Тен Ҳаг йирик ҳисобдаги ғалабадан сўнг: "Энг яхши ўйинимизни кўрсата олмадик"

Англия Премьер лигаси 19-туридан ўрин олган "Манчестер Юнайтед" - "Борнмут" баҳсида мезбонлар 3:0 ҳисобида зафар қучди.

Учрашувдан кейин ташкил этилган матбуот анжуманида манчестерликлар устози Эрик тен Ҳаг қуйидаги фикрларни билдириб ўтди.

"Натижадан мамнунман. Бироқ ўзимизнинг энг яхши ўйинимизни кўрсата олмадик. Тўғрисини айтиш керак: биз жамоа бўлиб ақлли ўйнамадик.

Бир-биридан чиройли 3 та гол урдик, лекин баъзида омадимиз келди. Давид де Хеа эса ажойиб ҳаракат қилди. Аммо жамоа сифатида янада яхшироқ ўйнашимиз мумкин эди.

Таблода 2:0 ҳисоби қайд этилаётган пайтда катта фарқ юзага келди. Баъзан тўпни ўзимизда ушлаб туриб, қачон дарвозага зарба йўллашни билишимиз лозим. Бу кейинги қадам. 

Йирик ҳисобда ғалаба қозониш ҳар доим ёқимли. Мухлислар учун ажойиб шоу бўлди. Ўйиндан ўйинга кучайиб боришимиз керак"-деди нидерландиялик мутахассис.