Тимур Кападзе - Украинадаги ғалаба, қайси ёшларимизга хориждан қизиқишлар бўлаётгани, Жалолиддиновнинг ўйини ва унинг

Ўзбекистон U-21 терма жамоаси Украинада Валерий Лобановский хотирасига бағишлаб ўтказилган халқаро турнирда бош совринни қўлга киритди. Тимур Кападзе бош мураббийлик қилаётган ёшларимиз тўғри йўлдан кетаётганиин мазкур мусобақа ҳам кўрсатиб берди. Бош мураббий sports.uz учун таассуротлари билан ўртоқлашди.

Украинадаги мусобақа тўғрисида

- Бу бизнинг жамоа учун биринчи халқаро турнирдаги ғалаба бўлди. Мураббий сифатида ҳам бу менинг дастлабки совриним. Бундан хурсандмиз, ишлашда яна давом этамиз. Олдимизда улкан мақсадлар бор. Бундай мусобақалар орқали катта тажриба орттирамиз. Украинадаги ғалаба жамоамизга янада ишонч ва куч бағишлайди. Олдимизда яна бошқа мусобақалар ва халқаро ўйинлар бор. Мана шундай турнирларда кучли рақибларга қарши ўйинлар орқали тажрибага эга бўламиз ва камчиликларимизни кўрамиз. Уларни ёшлари қандай ривожланяпти, қандай савияда ва бу борада бизнинг ёшлар қанақа даражада, нима камчиликларимиз, нимани устида кўпроқ ишлашимиз керак, мана шундай ҳолатда солиштира оламиз. Умуман айтганда, турнир фойдали бўлди. Бизни яхши кутиб олишди, ажойиб мусобақани ташкил қилишди. Тўғри, тўртта жамоа қатнашиши керак эди ва Тунис ҳам бор эди. Улар айрим сабабларга кўра, Украинага келмади. Учта жамоа бир-бири билан ўйнаб, турнир уюштирилди. Иккала учрашувда ғалаба қозондик. Озарбайжон ҳамда Украинага қарши учрашувларда футболчиларимиз яхши ҳаракат қилдилар. Иккала ўйинда ҳам йигитларимиз рақиблардан ҳар томонлама устунлик қилди. Руҳий, жисмоний, ўйин, умуман барча жабҳаларда кучлилигини кўрсата олишди, ҳақли равишда ғалаба қозондик. Яна бу йўлда ҳаракатни давом эттирамиз. Биз бундан ҳам кучли бўлиш учун меҳнат қиламиз.

кападзе1

Жасур Жалолиддинов ва унинг “Андижон”да тўп сураётгани ҳақида

- Жасур “Бунёдкор”дан “Локомотив”га ўтиб амалиётсиз қолиб кетди, анча пайт ютқазди. Аммо у иқтидорли ўйинчи. Профессионал бола, ўз устида ишлайди, янада кучаяди. Ҳамма нарса унинг қўлида. Шу тариқа ишлашда давом этса, кучли чемпионатлардан бирида ўйнаб, терма жамоаларимизга келажакда фойдаси тегади. Лекин бу йўлда тўхтамасдан меҳнат қилиши ва ишлаши керак. Боя айтдим, Жалолиддиновнинг иқтидори юқори. “Андижон”да ўйнаётганига келсак, футболчига қаерда бўлмасин ўйин амалиётига эга бўлаётгани фойдали. Албатта, кучли чемпионат ва кучли жамоада асосий таркибда тўп сурса, янада ривожланади. Аммо бошқа жойда захирада ўтиргандан кўра, “Андижон”га келиб спорт формасини тиклаётгани ўзи учун ҳам фойдали бўляпти. Жасур ўз ўйини билан “Андижон” жамоасига ҳам ёрдам беради ва ғалабаларига ҳисса қўша олади.

Кападзе Украинада қайси мутахассислар билан учрашди?

- Украинада бирор-бир мутахассис билан учрашмадим. Учала жамоа битта меҳмонхонада яшадик. Албатта, Украина ва Озарбайжон мураббийлари билан танишдим, гаплашдик. Улар билан битта жойда овқатландик, ҳар куни кўришдик. Украина футбол федерация раҳбарлари билан ҳам учрашдик. Лобановский хотирасига бағишланган тадбир уюштирилди, у ерда ҳам қатнашдик. Украинадаги ҳаётимиз шундай ўтди.

кападзе2_4

Бу терма жамоамизнинг асосий ўзагими?

- Мендаги шу ёшда бўлган ҳар бир футболчи терма жамоага номзод. Энг кучлилари албатта жалб қилинади. Олдимизга қўйилган вазифаларни уддалаш учун ҳаракат қилаверамиз. Шу боис Украинадаги мусобақага ушбу ўйинчиларни таклиф қилдим. Булардан ташқари, яна бошқа ўйинчиларимиз ҳам бор. Кейинги сафар уларни ҳам жалб қиламан, кўраман ва имконият бераман. Ким ўзини яхши кўрсата олса ва жамоа учун фойдали бўлса, ўшалар охир-оқибат терма жамоада бўлади. Бу терма жамоа! Уч ой ёки бир йилдан кейин ким қандай спорт формасида бўлади? Буни олдиндан била олмаймиз. Барчаси йигитларга боғлиқ. Ўз устида ишлаб, ҳар доим кучли бўлишса, уларга терма жамоа эшиги доимо очиқ. Бу ерга келгандан кейин футболчининг зиммасида катта масъулият ва катта юк туради. Юртимиз шаъни ва шарафини аъло даражада ҳимоя қиладиган футболчилар бўлиши лозим. Майдонга тушганда ўйинчи юракдан ўйнаши шарт, ғалаба қозониб мухлисларни албатта хурсанд қилиш керак. Терма жамоада селекция жараёнида доим иш олиб борилади. Хурсанд қилаётгани, футболчиларимиз ўсяпти. Жамоада рақобат бор. Энг асосийси, бу терма жамоанинг, юртимизнинг ғалабаси. Буни футболчиларимиз яхши тушуняпти ва тушунтиряпман. Биз янада кучли бўламиз. Ўртоқлик ўйини ёки расмий учрашув бўладими, терма жамоага чақирилган ҳар бир футболчи юракдан ўйнашига аминман.

Футболчиларимизга хориждан қизиқишлар ортяптими?

- Таркибимиздаги қайсидир ўйинчига четдан қизиқиш бўлаётгани ҳақида эшитмадим. Албатта, ҳозирги футболда ҳар бир ўйинчининг агентлари бор. Кимгадир қизиқ бўлса, ўша ўйинчини топишади ва агентига чиқишади. Агар бизнинг болаларимиз кучли чемпионатларга бориб ўйнашса, бундан хурсанд бўламан. Балки йигитларимизга хориждан энди қизиқишлар бўлар. Барибир Украинадаги ўйинларимизни кўпчилик келиб кўрди. Балки қайсидир футболчимиз кимгадир ёққан бўлиши мумкин. Буни вақт кўрсатади.

кападзе3_4

Навбатдаги режа қандай?

- Энди йиғин қачон бўлишини вақт кўрсатади. Барибир пандемия ҳали ҳам давом этяпти. Лекин ЎФА томонидан иш олиб бориляпти. Балки қайсидир жамоа бизга келиши мумкин. Аммо ҳозирдан йиғин қачон бўлиши ҳақида аниқ гапира олмайман. Агар бу борада аниқ маълумот бўлса, албатта хабарини берамиз.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар