Тимур Кападзе: Мени қўллаб-қувватлаганлардан Аллоҳ рози бўлсин

Ўзбекистон Миллий терма жамоасининг амалдаги бош мураббийи Темур Кападзе хорижлик мураббийнинг термамизга олиб келинишига муносабат билдирди. 

"Айни пайтда терма жамоамиз билан "Дўстлик"даги янги базамизда машғулотларни ўтказяпмиз. Пабло Бентунинг Тошкентга келганини кўрдик. Ушбу мураббий билан қанчалик келишувга эришилганидан хабаримиз йўқ. Ҳаммамиз учун энг асосийси — Ватан жамоаси. Агар Бенту бошқарадиган бўлса, хайрли бўлсин, дейман. Биз ҳамиша миллий жамоамизни қўллаб-қувватлаймиз. Бу ердаги шунчаки ном учун эмас, бош мураббий ким бўлишидан қатъи назар Ватан жамоасини қўллаб-қувватлаймиз. Ҳар биримиз жамоамизга мухлислик қилишимиз керак. 

Интернет тармоқларидаги турли гап-сўзларни кўряпман. Мени қўллаб-қувватлаётганларга раҳмат айтаман. Улардан Аллоҳ рози бўлсин. 

Раҳбарият, тажрибали, жаҳон чемпионатини кўрган мураббий билан бирга ишлаш ниятида. Балки, бу яхшиликка бўлиши мумкин. Жаҳон чемпионатида орттирилган тажриба аҳамиятга эга бўлиши мумкин. Биз ҳам қўлдан келганча ҳар доим ёрдамлашамиз. Қолганини вақт кўрсатади.

Нима бўлганда ҳам, мени қўллаб-қувватлаган мухлисларга раҳмат айтаман. Раҳбарият қандай қарор қабул қилса, буни қўллаб-қувватлаш керак. Буни жиддий танқид қилиш керак эмас. Жаҳон чемпионатига кўп вақт қолмади. Биз Мундиалда илк марта иштирок этамиз. Аксинча, футболчиларга яхши энергия ва яхши кайфият беришимиз зарур. 

Худога шукур, қисқа вақт давомида бўлса ҳам Миллий жамоани бошқардим. Халқимизнинг 34 йиллик орзуси амалга ошди. Бундан барчамиз хурсандмиз. Ўйлайманки, яхшиликка бўлади. Муҳими — терма жамоамиз кучли бўлсин, ўз ўрнига эга бўлсин, халқимиз бундан хурсанд бўлсин", - деди Кападзе.