Тўртта клуб "Барса" сардори Рафиньяни олиб кетишга тайёр

Яқинда «Барселона» спорт директори Деку жамоа вингери Рафинья билан шартномани узайтириш бўйича келишувга эришилганини айтган эди. Аммо орадан вақт ўтганига қарамай, бразилиялик футболчи ҳалигача каталонияликлар билан янги шартнома имзолаганича йўқ.

El Nacional нашри якшанба куни эълон қилган мақоласида «агар «Барселона» раҳбарияти Рафинья билан шартномани узайтириш осон кечади, деб ўйлаган бўлса, қаттиқ адашган», дея таъкидланади.

Нашр маълумотларига кўра, ҳозирда камида тўртта клуб Рафинья учун «Барселона» таклиф қила оладиган миқдордан анча юқори маош тайёрламоқда. Гап «Манчестер Юнайтед», «Арсенал», «Челси» ва Саудия Арабистонининг «Ал-Ҳилол» клублари ҳақида кетмоқда. Ушбу жамоаларга Рафиньяни олиш имконияти туғилса, трансферни амалга ошириш учун бор кучини ишга солиши айтилмоқда.

Шу билан бирга, 29 ёшли Рафиньянинг ўзи «Барселона»да қолишни исташи қайд этилмоқда. Каталония клуби бош мураббийи Ханс-Дитер Флик футболчи охир-оқибат янги шартномага қўл қўйишига ишонмоқда. Жоан Лапорта ва Деку эса бу масалани келаси бир ой ичида якунига етказишни режалаштирган.