"Тўғри, натижа учун чиқамиз, лекин ҳозир бу нарса биз учун муҳим эмас" - U-18 терма жамоамиз устози яна нималарни айтди?

ФИФА кунларидан фойдаланиб Ўзбекистон U-18 терма жамоамиз ҳам Тошкентда ўқув-машғулот йиғинини ўтказмоқда.

Таъкидлаш жоизки, вакилларимиз U-20 Осиё Кубогига тайёргарлик кўришмоқда. 2027 йили Озарбайжон ва Ўзбекистонда U-20 жаҳон чемпионати ўтказилади. Ушбу мундиалда айнан ҳозирги Ўзбекистон U-18 терма жамоамиз қатнашади.

9 ва 12 октябрь кунлари U-18 терма жамоамиз Озарбайжон U-18 термасига қарши ўртоқлик учрашувларида иштирок этди. Дастлабки ўйинда 0:0 ҳисоби қайд этилган бўлса, иккинчи баҳсда вакилларимиз 3:1 ҳисобида ғалаба қозонди.

Учрашувдан кейин бош мураббий Жамолиддин Раҳматуллаев ва футболчи Азизбек Тўлқинбеков ЎФА матбуот хизматига фикрлари билан ўртоқлашдилар.

Жамолиддин Раҳматуллаев: - Тўғри, ўйин натижа томонидан қониқтиргандир. Ҳа, доим майдонга натижа учун чиқамиз. Лекин бугунги кунда бу нарса биз учун энг муҳим жиҳат эмасди. Биринчи ўйинда кузатилган имкониятлардан фойдалана олмаслик муаммосини тузатиб, бу сафар вазиятлардан фойдалана олганимиз одамни хурсанд қилади. Аммо биринчи учрашувдаги яхши вазиятлар бўйича иккинчи ўйинда бироз кеч қолдик, дейишим мумкин. Балки бироз хотиржамликка берилишдими, аммо, ўтказиб юборилган голдан кейин футболчилар ўзларини қўлга олишди ва ўйинни назорат қилдилар. Бу яхши.

Булар жаҳон ва Осиё чемпионатини кўрган ўйинчилар ҳамда клубларида ҳам яхши даражада ўйнаётган ўйинчилар ҳисобланишади. Дарҳақиқат, тан олиш керакки, жамоани қабул қилиб олганимиздан ва селекция ишларидан сўнг халқаро ўйин учун бундан олдинги йиғинга чақиргандик. Сезиляптики, йигитлар жамоани олдинга бошлай оляптилар. Нафақат майдонда, балки майдон ташқарисида ҳам лидерлик сифатларини кўрсата олишяпти. Олдинда яна жуда кўп футболчилар бор. Ўйлайманки, улар билан биргаликда яхши жамоа шакллантирамиз.

Азизбек Тўлқинбеков: - Яхши ўйин бўлди. Бу орқали камчиликларимизни кўриб олдик. Қаерда нима қилиш кераклигини ҳам билдик. Умуман, плюс жиҳатларимизни ҳам кўрдик. Таассурот яхши бўлди. Бу ўйин орқали тажриба тўпладик. Биринчи бўлимда бироз бўшашдик. Олдинги учрашувда кўп ҳужумлар уюштиргандик. Бу сафар қандайдир майдонга бўшашиб чиқдик. Иккинчи таймда ўзимизни йиғиб олдик.

Мундиалга келадиган бўлсак, ишлашимиз керак бўлган кўп нарсаларимиз кўп. Жаҳон чемпионатида максимум натижа кўрсатмоқчимиз: мақсад - чемпион бўлиш!