"Тўғрисини айтсам, кутмагандим" - Жўрабеков "Қизилқум"нинг ғалабаси, танаффусда мураббийи қандай сўзларни айтгани ва рақиб ҳақида

Навоийнинг “Қизилқум” клуби учун янги футбол мавсуми муваффақиятли бошланди. Боиси, Жамшид Саидов жамоаси Тошкентда “Бунёдкор” майдонида мезбонларни 1:3 ҳисобида мағлуб этди.

“Қизилқум” таркибига янги қўшилган футболчи – ҳимоячи Шаҳбоз Жўрабеков ўйинни жуда фаол ўтказди. У рақиб дарвозасига гол урди ва битта голли узатмани амалга оширди. Ғалабада унинг ҳам ҳиссаси катта бўлгани рост.

Беллашувдан сўнг Sports.uz журналисти Жўрабековни фикрлари билан қизиқди.

- Янги мавсум сиз ва “Қизилқум” учун ажойиб бошланди. Биринчи учрашувдан кейинги таассуротларингиз қандай?

- Футбол ишқибозларини янги бошланган футбол мавсуми билан чин юракдан табриклайман. Ўйинга келсак, ҳаммаси аъло даражада, биз хоҳлаган ҳолатда ўтди. Қаердадир хато қилдик, қаердадир устунликка эришдик. Барибир биринчи учрашувда ҳаммада ҳаяжон бўлади. Барча ҳам чемпионатни ғалаба билан бошлашни истайди. Чунки ғалаба билан бошласак, бу кейинги ўйинларга ижобий таъсир қилишини ҳис қилган ҳолда “Бунёдкор”ни ютиш учун бор кучимизни ишга солдик. Худога шукр, барчаси яхшилик билан тугади. Ҳаракатимиз эвазига ўйин биз ўйлагандек ўтди.

- “Қизилқум”даги дебют учрашувингизда гол урдингиз ҳамда голга ассистлик қилдингиз. Чемпионат сиз учун мана шундай бошланишини кутганмидингиз?

- Тўғрисини айтсам, кутмагандим. Сабаби, ўтган йили жароҳатлар бўлди, захирада қолдим. Шуни ҳисобига хоҳлайсизми-йўқми, ўйин амалиёти кам бўлгандан кейин қўшилиб кетиш озроқ қийин кечади. Лекин аввало инсонни ўзига ишончи бўлса енгиб ўтади. Ҳаммаси Худодан, биз учун яхшилик билан тугади. Ўзим ҳам бундан жуда хурсандман.  

- Биринчи бўлимдан кейин менимча ҳеч ким “Қизилқум”ни 3:0 ҳисобида олдинга чиқиб олишини ўйламаганди. Буни қандай изоҳлайсиз? Танаффус пайтида муҳит қанақа эди? Биринчи бўлимдан сўнг ғалабани деярли тантана қилдингларми?

- Футбол 90 дақиқа ўйналади. 45 дақиқадан кейин ҳеч нима аниқ эмасди. Балки улар иккинчи бўлимда 3 та гол уриб ҳисобни тенглаштиришлари ҳам ҳеч гап эмасди. Ичкаридаги муҳит яхши эди. Мураббийимиз бизга танаффус чоғида ҳисоб 3:0 эмас, ҳали 0:0, эсдан чиқаринглар, бўшашманглар, вазият юз беришини кутинглар ва дарҳол ҳужумга ўтинглар, ҳимоявий ўйин қилманглар деб уқтирдилар. Лекин, барибир хоҳлайсизми-йўқми, футболчиларни орасида натижаддан келиб чиқиб бироз бўшашлик бўлади. 80-дақиқада ҳам ҳисоб 3:0 бўлгани учун озроқ бўшашдик, деб ўйлайман. Бу ҳолатларни кейинги учрашувларда бартараф қилиб, такрорламасликка ҳаракат қиламиз.

- “Бунёдкор”да янги мураббийлар штаби иш бошлаган ва таркибга ҳам кўплаб янги футболчилар келганди. Уларни қандай ўйин кўрсатиши қизиқ туюлганди. Илк беллашувдан сўнг энди барча “Бунёдкор”ни танқид қиляпти. Бу жамоадан қанақа ўйиннни кутгандингиз?

- Ўйиндан олдин мураббийларимиз билан биргаликда ҳар бир жамоани таҳлил қиламиз. Бу нарса барча клубларда бўлади. Биз ҳам “Бунёдкор”ни ўргандик. Мураббийларимиз кучли ва кучсиз тарафлари борлигини кўрсатишди. Шундан фойдаланиб ҳаракат қилдик, натижаси ёмон эмас. 3:1 ҳисобида ғалаба қозондик. Биз кутгандек яхши бошланди.

Шуҳратбек Жўраев.