Токио-2020. Баҳодир Жалолов иштирокидаги финал қачон бўлиб ўтади?

Супер оғир вазн тоифасида Олимпиада олтин медали учун жанг қилаётган Баҳодир Жалолов Токио-2020 финалига йўл олди. Ҳамюртимиз муросасиз кечган ярим финал баҳсида британиялик боксчига қарши рингга кўтарилди.

Фрейзер Кларк билан ўта шиддатли ва муросасиз руҳда ўтган жангда Жалолов ўзининг кучли зарбалари билан рақибини ожиз қолдирди. 3-раунд ўтиб бораётган бир вақтда, рақибнинг жароҳати сабаб беллашув муддатидан олдин тўхтатилди. Ўша вақтгача ҳисобланган очколар сони бўйича Жалолов яққол устунлик қилди ва Олимпиада финалига йўл олди.

Унга олтин медаль учун кечадиган баҳсда АҚШ вакили Ричард Торрес рақиблик қилади. Ушбу жанг 8 август куни, Тошкент вақти билан 11:15 да старт олиши режалаштирилган. Торрес ярим финалда қозоғиcтонлик Қамишбек Кўнкабаевни мағлуб этди.

Маълумот учун, ушбу вазн тоифасидаги амалдаги Олимпиада чемпиони Тони Йока ҳисобланади. Франциялик боксчи Риодаги финалда Буюк Британия шарафини ҳимоя қилувчи Жозеф Жойс устидан ғалаба қозонганди. Жалолов эса, худди шу спортчига чорак финалда мағлуб бўлган.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Комментарии

Для написания комментариев пройдите авторизацию