Тўпурар дарвозабон - Чилаверт ёдингиздами? У ҳозир нима билан банд эканлигини биласизми?

Футбол оламида машҳур дарвозабонлар кўп. Мутахассислар улар орасида яшил майдонда инқилоб қилишни уддалаганларни алоҳида эътироф этишни хуш кўради. Айниқса, парагвайлик Хосе-Луис Чилаверт футболга кириб келгач, дарвозабонлар ҳақидаги тасаввур ўзгариб кетди.

Чилаверт – чинакам тўпурар кипер. Бунақаси унга қадар футбол оламида кузатилмаган. Қаҳрамонимиз терма жамоаси сафида 8 та гол киритибгина қолмай, дарвозабонлар орасида хет-трик қайд этган ягона инсон саналади. 1980 йилларда карьераси бошланган бўлса, 2005 йилда унинг футболдаги фаолияти якунига етди.

Эътиборлиси шундаки, қаҳрамонимиз футболни тарк этгач, ҳаёти чинакам кинога айланди. Аввалига, сохта ҳужжатлар сабабли ярим йил қамоқда ўтирган бўлса, кейин маҳаллий жиноий гуруҳ аъзолари билан алоқадорлиги аниқланди. Шу пайтга қадар Британия элчиси ва КОНМЕБОЛ ҳақидаги кескин фикрлари сабабли жуда катта жанжаллар юзага келди. Унинг иштирокидаги бирор кўрсатув ёки жонли эфирлар машмашасиз ўтгани йўқ.

2018 йилда эса, у Диего Армандо Марадона билан уришиб қолди. Аргентиналик афсона уни "бақалоқ", деб ҳақорат қилди. Чилаверт ҳам қарздор бўлиб қолгани йўқ. У ўзининг барча ижтимоий тармоқларида қуйидаги постни ёзиб қолдирди:

"Марадона ФИФА президенти Инфантинонинг оёқ кийимини тили билан тозалайдиган даражада тубан инсон. Ҳа, мен семизман, аммо жуда бахтли "бақалоқман"! Сабаби, ҳеч қандай наркотик моддаларга ружу қўймаганман".

Марадонанинг сўзлари нишонга теккани аниқ. Сабаби, Чилаверт сўнгги йилларда ортиқча вазн муаммоси билан бир неча маротаба тўқнаш келди. Спорт билан шуғулланишни камайтирганига қарамай, Луис халқ меҳрини қозонишни бошлади. У турли тадбир ва норозилик намойишларида халқ билан эканлигини кўрсатиб, қисқа муддат ичида сиёсат оламига кириб келди. Жаҳлдор, адолатпарвар ва коррупциядан нафратланадиган собиқ футболчи Парагвай халқи меҳрини қозонди. 2020 йилга келиб, Чилаверт бор эътиборини президентликка қаратди. У 2023 йилда бўлиб ўтадиган сайловларда ўз номзодини илгари сурмоқчи.

У сайлов олди кампанияни аллақачон бошлаб юборган. Унинг партияси олдинга сураётган ғоя ҳам мавжуд эди, бироқ сўнгги ойларда у иккиланишни бошлади. Сўнгги пайтларда, у пресса билан алоқани тўлиқ узиб қўйди. У ўзининг сўнгги интервьюсида бу масалага тўлиқ ойдинлик киритди.

"Тўғри, мен журналистлардан қочиб юрибман. Иккиланаётганим ҳам рост. Сиёсат билан шуғулланиш осон эмас. Барча мени нима билан шуғулланаётганимни билишни истайди, бироқ ишонинг мен инсонларни ҳурмат қиламан. Мен билан расмга тушмоқчи бўлганларга ҳеч қачон рад жавобини бермаганман. Инсонларни мени таниб қолишидан фахрланаман."

Ўтган йили Лео Месси ўз футболкасини афсонавий дарвозабонга совға қилди. Чилаверт эса уни твиттердаги шахсий аккаунтига жойлади. Тўғриси, бу суратни кўргач, Парагвай футболи афсонасини таниб олиш жуда қийин бўлди. У асабий жанжал ва тўполонлардан чарчагани яққол кўриниб турибди, бироқ ўз шаштидан қайтгани йўқ.

"Афсуски, сиёсатдаги ифлослик футболга ҳам ўтди. У секин-аста Парагвай футболини ўлдириб бормоқда. Катта карьера қилишни истаган футболчилар йўлнинг бошиданоқ ўтиб бўлмас тўсиқларга дучор бўлмоқда. Баъзи болаларнинг ота-онаси таниш-билиш ёрдамида фарзандларини академия ва футбол мактабларига жойлаб қўймоқда."

Шу кунга қадар, футболчилар орасида кейинчалик мамлакат президентлига қадар кўтарилганлар мавжуд. Жорж Веа сўзимизга ёрқин мисол бўлиши мумкин. Хосе Луис Чилаверт унинг изидан борадими? Бу саволга 1 йилдан сўнг, жавоб олишимиз мумкин.

Я . У