Торрес ПСЖдан бўлган қизиқишга изоҳ берди

«Барселона» ҳужумчиси Ферран Торрес атрофидаги сўнгги трансфер миш-мишларига муносабат билдирди. ОАВда уни «ПСЖ» билан боғлаётган хабарлар пайдо бўлганди. Футболчи эса бу каби маълумотларга жиддий қарамаётганини ва Париж клуби билан ҳеч қандай музокара олиб бормаслигини айтди.
 

Торреснинг таъкидлашича, у Луис Энрике жамоасининг эҳтимолий қизиқиши ҳақида ҳам хабардор эмас ва матбуотдаги шов-шувли хабарлар уни безовта қилмаяпти.
 

««ПСЖ» ҳақида нима дейманми? Бу ҳақда ҳеч нарса эшитмаганман. Миш-мишларга умуман эътибор бермайман», — дея келтиради футболчининг сўзларини Diario Sport.
 

Ўтган мавсумда Ферран Торрес «Барселона» ҳужум чизиғида муҳим фигурага айланди. У барча мусобақалар доирасида жами 49 та ўйинда майдонга тушиб, 21 та гол урди ва 3 та голли узатма амалга оширди. Универсал ўйин услуби туфайли Ферран доимий равишда ҳам қанотларда, ҳам марказий ҳужумчи сифатида фойдаланилди.