Toshkent CAFA hakamlar seminariga mezbonlik qilmoqda

«King Plaza» mehmonxonasida CAFA hakamlar seminari boshlandi. Unda CAFAga a’zo mamlakatlardan 23 nafar hakamlar ishtirok etmoqda. E’tiborli tomoni, 5 nafar hakamimiz — Firdavs Norsafarov, Asker Nadjafaliev, Akobirxo‘ja Shukurullaev, Edita Mirobidova va Roziyabonu Yusupova ham ushbu seminarda bilim va ko‘nikmalarini oshirib borishmoqda.

Seminarni O‘FA birinchi vitse-prezidenti Ravshan Ermatov ochib berib, ishtirokchilarga bugungi kunda futbolga zamonaviy texnologiyalarning kirib kelishi ortidan futbolning jadallik bilan rivojlanib borayotgani, muxlislarga yanada sifatli futbol taqdim etish imkoniyati oshib borayotganini ta’kidladi.

Tabiiyki, futbolning yanada jozibaliroq bo‘lishida hakamlarning o‘rni beqiyos bo‘lishiga alohida urg‘u berildi. FIFA ham hakamlik borasida katta yangiliklarga qo‘l urayotgani bejiz emasligi ta’kidlandi. Shu sababdan CAFA hakamlikka jiddiy e’tibor berib, uning rivojlanishi yo‘lida qator ishlar amalga oshirilayotgani bildirildi.

Seminar davomida hakamlar o‘yin qoidalari yuzasidan nazariy test va video test topshirishdi. Shuningdek, OFK instruktorlari tomonidan o‘yindan tashqari holat, taktik follar mavzularida nazariy mashg‘ulotlar tashkil etildi.

Qayd etish kerak, ilmiy-amaliy mashg‘ulotlarni o‘z ichiga olgan mazkur seminar 29 yanvargacha davom etishi rejalashtirilgan, - deyiladi xabarda.