"Тоттенҳем" - "Антверпен": Матнли трансляция

Ассалому алайкум, муҳтарам футбол ихлосмандлари! Европа Лигаси 6-туридан ўрин олган "Тоттенҳем" - "Антверпен" ўйини сайтимиз томонидан сизга матнли трансляция шаклида ҳавола этилади. Ўйинни сиз билан Абдулла Маннонов кузатиб боради. 

• 90+4'
  

  Учрашув якунланди. "Тоттенҳем" ўз уйида ишончли ғалабага эришиб, гуруҳ босқичини 1-ўрин билан якунлаб олди. Матнли трансляцияни Абдулла Маннонов олиб борди. Эътиборингиз учун раҳмат!

• 90'
  

  Бош ҳакам Хесус Хиль Мансано учрашув асосий вақтига жами тўхталишлар учун 3 дақиқа вақт қўшиб берди.

• 90'

  Ҳарри Кейн 2 футболчини алдаб ўтиш эвазига дарвозабон билан деярли яккама-якка вазиятга чиқиб олганига қарамай, ундан фойдалана олмади! Ух, қандай вазият!!

• 88'
  

  Давинсон Санчес қўполлиги учун сариқ карточка билан жазоланди.

• 87'

  Сўнгги дақиқаларда шпорлардан тезкор штурмлар! Ўйин темпи сўнганича йўқ!

• 86'

  Вазият қалтис. Бенавентенинг жароҳати уни бугунги ўйинни якунлашига тўсқинлик қилади. У майдонни тарк этди.

• 85'
  

  Кристиан Бенавенте ("Антверпен") жароҳатлангандай таассурот уйғотмоқда. Шифокорлар майдонда.

• 84'

  Симен Юклерод тўп учун курашда рақибини чиройли тарзда енгди, лекин тез фурсат ичида ўзи уни йўқотди.

• 83'

  Шимолий Лондонликлар одатдагидай штурмлари билан рақибга хавф туғдиришда давом этмоқда.

• 81'

  Давинсон Санчес қанотдан узатилган ажойиб кроссни боши билан дарвозага йўналтирди, бироқ тўп сал юқорилаб кетди.

• 77'
  

  Ампома қўпол подкати учун испаниялик ҳакам томонидан сариқ карточка билан жазоланди.

• 73'

  "Антверпен" ҳам сўнгги ўзгаришларини амалга ошириб бўлди: Мануэл Бенсон ва Абдулайе Сек майдонни тарк этди, уларнинг ўрнига Бирже Верстрет ва Кодзи Миёси майдонга тушди.

• 71'
  

  ГООООООООООООООЛЛЛ!!! Жованни Ло Челсо ажойиб узатмани қабул қилиб олди ва дарвозабон билан бирга-бир вазиятга чиқиб кетиб, ҳисобни ишончли кўринишга келтириб қўйди! 2-0!

• 69'
  

  Жованни Ло Челсо узатиб берган бурчак тўпини Ҳарри Кейн боши билан чап бурчакка тўғирлаб юборди, дарвозабон эса ўз ўрнида!

• 69'

  Майдон эгалари яна бир бурчак зарбасига эга бўлишди.

• 68'
  

  "Тоттенҳем" 5-ўзгаришни ҳам амалга ошириб бўлди. Лукас Моура ўйинни энди захира ўриндиғида кузатиб ўтиради, Мусса Сиссоко эса майдонда ҳаракат қилади.

• 67'

  Сон голга жуда яқин келди! Унинг берган кучли зарбаси сўнгги сониялардаги рикошет оқибатида йўналишини ўзгартириб, майдон ташқарисига чиқиб кетди. Бурчакдан тўпни "Тақачилар" ўйинга киритиб беради.

• 65'

  Тўпни шпорлар назорат қилмоқда. Устунлик ҳозирча уларда.

• 60'
  

  Моуриньо яна 2 ўзгаришни амалга оширадиган бўлди: ҳозиргина гол урган Карлос Винисиус ва яхши ўйнаган Уинкс ўрнига Ҳарри Кейн ва Танги Ндомбеле майдонга тушди.

• 59'
  

  "Антверпен"да ҳам 2 ўзгариш: Жордан Лукаку ва Мартин Хонгла ўрнига Симен Юклерод ва Франк Боя майдонга тушишди.

• 58'
  

  Моуриньо жамоасида ўзгариш: Бейл майдонни тарк этиб, ўрнига Сон Хионг Мин ўйинни давом эттирадиган бўлди.

• 57'
  

  ГОООООООООООООООООЛЛЛ!!! Карлос Винисиус қулайгина вазиятдан оқилона фойдаланиб ҳисобни очишга муваффақ бўлди! 1-0!

• 56'

  Меҳмонлар футболчиси Абдулайе Сек рақибини футболкасидан тортиб ушлаб қолди, буни кўриб турган ҳакам эса ҳуштак чалиб, жарима зарбаси белгилади.

• 54'
  

  Жарима зарбасидан сўнг бурчак тўпига эга чиққан "Антверпен" уни ҳам ноаниқ амалга оширди.

• 54'

  Лукас Моура жуда қўпол фол ишлатди. Ҳакам ўйинни тўхтатишга мажбур бўлди.

• 51'

  "Тақачилар" ҳимоячиси Метт Доэрти қанотдан рақиб жарима майдони ичига ажойиб кросс амалга оширди, бироқ ҳимоячилар тўпни майдон ташқарисига чиқариб юборишди.

• 48'

  Лукас Моура жарима майдони ташқарисидан туриб кучли зарба беришга уриниб кўрди, бироқ унинг зарбаси блокланди.

• 46'
  

  "Антверпен"да ҳам ўзгариш: Лиор Рафаэлов майдонни тарк этиб, ўрнига Нана Ампама тушди.

• 46'
  

  "Тоттенҳем" таймни ўзгариш билан бошлаб олди. Серхио Регилон ўрнига майдонга Стивен Бергвейн тушди.

• 46'
  

  2-таймга старт берилди.

• 45'

  Футболчилар майдонга қайтишмоқда. Биз ҳам қайтамиз.

• 45+3'
  

  Хесус Хиль Мансано ҳуштагини чалди ва футболчилар ечиниш хонасига йўл олишди. 1-тайм якунланди, танаффус.

• 45'
  

  Учрашувнинг 1-бўлимига 2 дақиқа вақт қўшиб берилди.

• 45'
  

  Мана бу ҳақиқий сейв! Карлос Винисиуснинг берган кучли зарбасини Бейронвард моҳирлик билан қайтариб қолди! Қойил!

• 43'

  Тўп назорати шпорлар томонда. Ўйин бир маромга тушиб қолди, жамоалар ҳужумга ўтишга шайланишмоқда.

• 38'

  Мануэл Бенсон рақибининг позицион ҳужумига қоида бузиш орқали халақит берди ва фол ишлатди. "Тоттенҳем" жарима зарбасига эга бўлди.

• 35'
  

  Ух, қандай имконият!!! Жованни Ло Челсонинг жарима майдони ичидан туриб дарвозанинг тўққизлик бурчагига берган кучли зарбасини Алиризо Бейронвард қийинчилик билан қайтариб қолди! Суперсейв!

• 34'
  

  Мануэл Бенсон ("Антверпен") ижро этган бурчак тўпига ҳеч ким эга чиқолмади ва рақиблар қарши ҳужумга ўтиб кетишди.

• 34'

  "Антверпен" позицион ҳужум ташкил этмоқда. Лондонликлар ҳимояланмоқда.

• 32'

  Рақиб ҳужумини эндигина бир амаллаб тўхтатишга эришган шпорлар яна бир бор ўша нуқтада қоида бузди ва жарима зарбасига сабаб бўлди. Қоидани бу сафар Регилон бузди.

• 31'

  Лондонликлар сафида Карлос Винисиус ўз жарима майдони яқинида қўполлик ишлатди ва Хесус Хиль Мансано жарима зарбаси белгилади. Мехмонларда хавфли вазият юзага келиши мумкин.

• 28'

  Метт Доэрти ҳужумда фол ишлатиб жамоасининг ҳужуми тўхтатилишига сабаб бўлди. 

• 28'
  

  Моура тўпни ҳаволатиб ичкарига узатиб берди, бироқ тўпга ҳеч ким ета олмади.

• 27'

  Жованни Ло Челсо жарима зарбасини ижро этди. Тўп жонли деворга тегиб майдон ташқарисига чиқиб кетди. Бурчак зарбаси.

• 25'
  

  Бельгияликларнинг бошқа бир футболчиси Абдулайе Сек рақибини чалиб йиқитгани учун огоҳлантириш олди. Учрашувдаги илк сариқ карточка.

• 23'

  Меҳмонлар аъзоси Жереми Гелен ишлатган фоли учун ҳакамдан оғзаки огоҳлантириш олди. Кейинги фол учун у карточка билан "сийланиши", ҳакамнинг хатти-ҳаракатидан дарров сезилди.

• 23'

  Карлос Винисиус ("Тоттенҳем") воқеалар ривожидан олдинлаб кетди: ён ҳакам байроғини кўтарди.

• 19'

  Майдон марказида тўп учун жиддий кураш кечмоқда. Жамоалар тўп назоратига ҳаракат қилишмоқда ва ҳозирча буни Моуриньо шогирдлари кўпроқ ўхшатишмоқда.

• 18'

  Ҳаммаси жойида: Тангангада жиддий жароҳат йўқ, у ўйинни давом эттиролади.

• 17'
  

  "Тоттенҳем" футболчиси Яфет Танганга майдонда тиббий ёрдам олмоқда. Жароҳат қандай эканлиги ҳақида яқин дақиқалар ичида билиб оламиз.

• 16'

  Лукас Моура узоқ масофадан зарба берди, бироқ тўп ҳимоячилардан бирига тегиб, йўналишини ўзгартирди.

• 14'

  Жованни Ло Челсо рақибига нисбатан қўпол ўйин намойиш этди, учрашув арбитрлари эса хуштагини чалиб, жарима зарбаси белгилади.

• 11'
  

  Тез ташкил қилинган ҳужум тез якунланди: Гарет Бейл ўйиндан ташқари ҳолатда қолиб кетди.

• 10'

  Мезбонлар қисқа паслар орқали тўпни назорат қилмоқда. Фурсат бўлиши биланоқ ҳужумга ўтишмоқчи.

• 9'

  "Антверпен" футболчиси Мартин Онгла тўпга жуда қўпол тарзда чиқиб келди ва қоида бузди. Барчасини кўриб турган ҳакам хуштак чалиб, ўйинни тўхтатди.

• 6'

  Гарет Бейл бурчакдан ҳаволатиб узатиб берилган тўпни бир сакраб дарвозага йўналтирди, бироқ тўп дарвозанинг ўнг устуни ёнгинасидан ўтиб кетди! Учрашувдаги илк росмана хавфли вазият!

• 6'
  

  Шпорлар бурчак тўпи ишлаб олишди. Лукас Моура уни ижро этади.

• 4'
  

  Лайнсмен байроғини кўтарди - "Антверпен" футболчиларида ўйиндан ташқари ҳолат қайд этилди.

• 1'
  

  Учрашув ҳаками Хесус Хиль Мансано ҳуштагини чалди ва ўйинга старт берилди!

• 0'

  Футболчилар "Тоттенҳем Ҳотспур" стадионига чиқиб келишмоқда. Европа Лигаси мадҳияси янгради.

• 0'

  Ассалому алайкум, қадрли футбол ихлосмандлари! Яқин дақиқалар ичида бошланувчи Европа Лигаси 6-туридан ўрин олган "Тоттенҳем" - "Антверпен" бахсини сиз билан биргаликда кузатиб борамиз. Матнли трансляцияни Абдулла Маннонов олиб боради.