“Тоттенхэм” Франкни “Арсенал”ни кўп мақтагани учун ҳайдади

Англия Премьер-лигасида ишлари юришмаётган “Тоттенхэм” бош мураббий Томас Франкни истеъфога чиқарган эди. Энди лондонликларнинг бу қарори фақатгина натижаларга боғлиқ бўлмагани айтилмоқда.

Жумладан, “Тоттенхэм” футболчилари Томас Франк иш жараёнида “Арсенал”ни тез-тез тилга олишидан норози бўлган. The Telegraph нашри хабарига кўра, Франкнинг “канонирлар”га бўлган ҳаддан ташқари боғлиқлик унинг ишдан бўшатилишида асосий омиллардан бирига айланди.

Даниялик мураббий жамоавий йиғилишларда мунтазам равишда Англия Премьер-лигаси етакчиларининг ютуқларини муҳокама қилган, бу эса айрим футболчиларнинг асабига теккан.

- У доимо футболчилар олдида “Арсенал”ни тилга оларди ва улар бундан тезда чарчай бошлади. Ҳатто “Эмирейтс”даги ўйиндан олдин ҳам, ундан кейин ҳам у ўйинчилар билан “Арсенал” жамоаси қанчалик кучли эканини муҳокама қилган эди. Бу жамоадагиларнинг тоқатини тоқ қилди, - дейди клуб ичидаги инсайдер The Telegraph нашрига.

Қолаверса, “Тоттенхэм”  Томас Франк қўл остида Англия Премьер-лигасида кетма-кет саккизта ўйиндан бери ғалаба қозона олмади.