“Тоттенхэм” Ҳарри Кейнни сотишга қарор қилди

“Тоттенхэм” раҳбарияти ёзда жамоа юлдузи Ҳарри Кейн бўйича манфаатли таклифлар бўлса, уни кўриб чиқишга тайёр эканини билдирмоқда.

Ўтган ёзда “Манчестер Сити” моҳир тўпурар учун ўта катта маблағ таклиф қилганига қарамай, “Тоттенхэм” президенти Даниэль Леви асосий тўпурарини қўйиб юбормаган эди.

Кейннинг ўзи фаолияти давомида совринларни қўлга киритишни орзу қиляпти ва бунинг учун кучлироқ клубда тўп тепишни истаяпти.

Ҳарри Кейнга асосан “Манчестер Сити” даъвогар. “Шаҳарликлар” бош мураббийи Хосеп Гвардиола бу тўпурарнинг мухлиси ҳисобланади. Бундан ташқари, ПСЖни бошқараётган Маурисио Почеттино агар ёзда “Манчестер Юнайтед”ни қабул қиладиган бўлса, жамоага Ҳарри Кейнни олиб келиш кераклигини ҳам таъкидлаган.

Ҳужумчининг “шпорлар” билан ҳамкорлиги 2024 йилнинг ярмигача расмийлаштирилган. У жорий мавсумда 34 та учрашувда 17 та тўп киритди.