Туркия Парагвайга қарши ўйин олдидан таркибда катта ўзгаришлар тайёрламоқда

Туркия терма жамоаси бош мураббийи Винченцо Монтелла жаҳон чемпионатида Парагвайга қарши иккинчи тур учрашуви олдидан таркибда жиддий ўзгаришлар қилишни режалаштирмоқда. Бу ҳақда Turkish Football нашри хабар берди.

Австралияга қарши биринчи турдаги 0:2 ҳисобидаги мағлубиятдан сўнг мураббий ҳужум чизиғини қайта кўриб чиқишга қарор қилган. «Ювентус» ярим ҳимоячиси Кенан Йилдиз мусобақанинг очилиш ўйинида захирадан майдонга тушиб, ўзини яхши томондан кўрсатган эди. Энди у асосий таркибдан жой олиши ва Керем Актюркоглу ўрнини эгаллаши мумкин.

Шу билан бирга, Барыш Алпер Йилмазнинг майдондаги вазифаси ҳам ўзгариши эҳтимолдан холи эмас. У марказий ҳужумчи сифатида ёки ўнг қанотда ҳаракат қилиши мумкинлиги айтилмоқда.

Ўйинчилар ротацияси фақат ҳужум билан чекланмайди. Ярим ҳимояда ҳам ўзгаришлар кутилмоқда: мураббийлар штаби Джан Узун ва Дениз Гюл иштирокидаги схема вариантларини кўриб чиқмоқда. Ҳимоя чизиғида эса ўнг қанотда Мерт Мюльдюр Зеки Челик ўрнини босиши мумкин.

Биринчи турдан сўнг Туркия терма жамоаси D гуруҳи жадвалида сўнгги ўринни эгаллаб турибди. 20 июнга белгиланган Парагвайга қарши беллашув Монтелла шогирдлари учун плей-офф босқичига йўл олиш йўлида ҳал қилувчи ўйин бўлиши кутилмоқда.