Туркия терма жамоаси бош мураббийни ишдан ҳайдади
Мағлубиятлар қимматга тушди
Туркия футбол федерацияси (TFF) Италия мутахассиси Винченцо Монтелла билан шартномани узайтирмасликка қарор қилди. Бу ҳақда ташкилот матбуот хизмати маълум қилди.
Маълумот учун, Туркия терма жамоаси Миллатлар лигаси гуруҳ босқичида ўтказган тўрт учрашувининг барчасида мағлубиятга учради.
52 ёшли Винченцо Монтелла 2023 йилда Туркия терма жамоасига бош мураббий этиб тайинланган эди. Унинг қўл остида жамоа 2024 йилги Европа чемпионатида чорак финалгача етиб борди, шунингдек, жамоа 2026 йилги жаҳон чемпионатига йўлланма олди, аммо у ерда плей-офф босқичига чиқа олмади.
Монтелла терма жамоага келгунга қадар Туркияда "Адана Демирспор", Испанияда "Севилья", Италияда эса "Фиорентина", "Милан", "Сампдория", "Катания" ва "Рома" клубларини бошқарган.
Футболчи сифатида Винченцо Монтелла 2000/2001 йилги мавсумда "Рома" таркибида Италия чемпиони бўлган. Шунингдек, у 2000 йилда Италия терма жамоаси сафида Европа чемпионатида кумуш медалга эга чиққан.
Изоҳлар (0)