"Турон"ни тарк этган футболчи: "Жамоадан кетишим кутилмаганда бўлди, аввал ҳаммасини гаплашиб олгандик, лекин..."

Яйпаннинг “Турон” клубидаги вазиятдан хабардор бўлсангиз керак. Клуб биринчи даврани ғалабасиз якунлади. Шунингдек, давра якунланаётган маҳалда клубда молиявий муаммолар борлиги ҳақида гап-сўзлар тарқалганди. Лекин жамоа иккинчи даврани давом эттириб қўядиган бўлди.

Таркибда эса анча ўзгаришлар юз берди. Айниқса, бир талай клуб етакчилари “Турон”ни тарк этишди ва ўрнига асосан ёш футболчилар жалб қилинди. Жамоа билан хайрлашган ўйинчилар орасида иқтидорли ҳимоячи Хушнуд Авилов ҳам бор. У “Турон”даги бир неча йиллик фаолиятидан сўнг кетишга қарор қилди.  

- Хушнуд, “Турон”дан кетишингиз кутилмаганда юз бердими?

- “Турон” жамоасини тарк этишим кутилмаганда бўлди. Ундан аввал ҳаммасини гаплашиб олгандик. Лекин кейин нимадир бўлдию, клубдан кетдим.

- Бунга раҳбарларнинг клубни молиялаштиришни тўхтатиши ҳақидаги гап сўзлари ҳам сабаб бўлдими?

- Ҳамма гап шунда бўлса керак, деб ўйлайман.

- “Турон”да қолиш имкониятингиз йўқмиди?

- Бор эди. Боя айтганимдек, ўзи барча нарсани гаплашиб олгандик. Бироқ нимадир сабаб бўлиб келиша олмадик.

- Энди режангиз қандай? Таклифлар борми?

- Таклифлар бор. Ҳозирча гаплашяпмиз. Кўрамиз, тез орада аниқ бўлади.

- Легионерга айланиш имкониятингиз ҳам борми?

- Йўқ, ҳозирча легионер бўлишим қийинроқ.

- “Турон”даги ўтказган фаолиятингизда энг эслашга арзигулик ҳолат сифатида нимани айта оласиз?

- Эсда қолган кунлар сифатида Суперлига йўлланмасини қўлга киритган кунимиз бўлса керак. Ўша кун эсда қоладиган кун бўлганди.

- Лекин “Турон”ни Суперлигада ишлари юришмаяпти, ўтган сафар ҳам, бу сафар ҳам. Сизнингча, нега бундай бўляпти?

- Олдин айтганимдек, жамоада кўп мураббийлар алмашди. Шу сабабли кўп мағлубият бўлди, деб ўйлайман.

- “Турон”дан кўпчилик кетди ва таркиб асосан ёшартирилди. Ҳали чемпионатда ютгани йўқ. Суперлигадаги имкониятини қандай баҳолайсиз?

- Аниқ бир нарса айта олмайман. Лекин нима бўлса ҳам иккинчи даврани яхши тугатиб қўйишсин.

Шуҳратбек Жўраев.