U-23 Осиё чемпионати. Ўзбекистон ўрин олган "С" гуруҳи жамоалари ҳақида нималарни биласиз?

Турнир бошланишига бир неча кун қолган бир пайтда the-AFC.com Ўзбекистон, Жанубий Корея, Хитой ва Эрон олимпия терма жамоаларининг кучли жиҳатларига тўхталиб ўтди.

Ушбу мусобақанинг энг аҳамиятли томони унинг Токио-2020 олимпиадаси йўлланмаси учун ўйналаётганидадир. Турнирнинг энг кучли 3 та жамоаси ушбу йўлланмани қўлга киритишини инобатга олиб, чорак финалга чиқиш учун жамоалар ўртасида жиддий рақобат кечишини таҳмин қилиш мумкин.

Ўзбекистон

Саралашдаги натижа: «F» гуруҳи ғолиби.

2018 йилдаги натижа: Чемпион

Хитойдаги мусобақа ғолиби бўлган Ўзбекистон бу галги турнирга нафақат ўз титулларини ҳимоя қилиш, балки Токио олимпиадасига йўлланмаларни қўлга киритишни мақсад қилишган.

2018 йили чемпион бўлган таркибдан 6 та футболчи бу гал ҳам Таиландга етиб келган. Вьетнамга қарши драматик финалнинг асосий таркибидан ўрин олган ва Ўзбекистон терма жамоасининг Хитойдаги мусобақада ғолиб чиқишида муҳим ўрин тутган Азиз Ғаниев ва Жасурбек Яхшибоев шулар жумласидан.

Ироққа қарши ўтказилган иккала ўйинда ҳам фаол ҳаракат қилган ва уларнинг бирида хет-трик қайд этган Бобур Абдихолиқов ёниб турибди. Қанот ҳимоячиси Ҳожиакбар Алижонов эса «Пахтакор» билан чемпионликни нишонлагач, Таиландда ҳам ўз коллекцияси учун медаль олишни мақсад қилган.

Жанубий Корея

Саралашдаги натижа: «H» гуруҳи ғодиби

2018 йилдаги натижа: 4-ўрин

1988 йилдан бери эркаклар ўртасида футбол бўйича Олимпиада ўйинлари Жанубий Кореа иштирокида бўлиб ўтмоқда ва ўтган йилги ёшлар ўртасида жаҳон чемпионати финалигача бўлган ажойиб ўйинлар шарқий осиёликларни Олимпиадага йўлланма берувчи 3 та йўлланмадан бирини қўлга киритишда фаворитлардан бири эканлигини кўрсатади. Бош мураббий Ким Ҳак Бум Польшада кечган жаҳон чемпионатидан сўнг таркибда кичик ўзгаришларга қўл урган.

Испаниянинг «Валенсия» клубида ҳаракат қилаётган умидли футболчи Ли Канг Ин Европа футболи ҳавосидан баҳраманд бўлган. «Фрайбург» футболчиси Жеонг Ву Йонг ҳам асосий таркиб футболчиларидан.

«Чонбук Моторс» жамоаси дарвозабони Сонг Бум Кёнг яқиндагина таркибга киритилган. Ли Донг Гёнг эса Хитойдаги мусобақада 3 ўйинда 6 та гол киритиб, тўпурар бўлган ва жанубий кореаликлар гуруҳни Австралиядан йуқорида якунлашган.

Хитой

Саралашдаги натижа: «J» гуруҳи ғолиби

2018 йилдаги натижа: Гуруҳ босқичи

Малайзияга қарши ўйиннинг 84-дақиқасида Жианг Шенглонг ҳисобни тенглаштирмаганда Гусс Ҳиддинк шогирдларини Таиланддаги мусобақада кўрмаслигимиз мумкин эди. Саралашдаги қийин ўйинларга қарамай миллионлаб хитойликлар Токио-2020 йўлланмасини умид қилишяпти

Ҳозирда жамоани Ҳао Вей бошқармоқда. Мураббий жамоани маҳаллий футболчилар билан шакллантирган. Кетма-кет уч маротаба ушбу мусобақанинг гуруҳ босқичидан чиқолмаган хитойликлар бу галги мусобақага қай тарзда тайёргарлик кўришганини 9 январь куни, Жанубий Кореяга қарши баҳсда кўрамиз.

«Бейжинг Гоан»нинг 23 ёшли ҳужумчиси - Жанг Юнинг хитойликлар мураббийининг асосий қуролларидан бири. 2019 йилги мавсумда у жамоаси таркибида 8 та гол ва 5 та голли узатмани амалга оширди. Таъкидлаш жоизки, тўрт йиллик Европадаги фаолиятидан сўнг Хитойдаги дастлабки мавсум ёмон чиқмади. «Гуанчжоу Эвергранд» вакили Янг Лию ўтган мавсум Хитой Суперлигасида энг кўп голларда иштирок этган футболчи бўлди.

Эрон

Саралашдаги натижа: «C» гуруҳидан йўлланма олди

2018 йилдаги натижа: Саралашдан ўта олмаган

Мана 44 йилдирки, Эрон Олимпиада ўйинларининг футбол баҳсларида қатнаша олмаяпти. Аммо бу галги таркиб Эроннинг келажаги ўтмишидан кўра ёрқинроқ бўлишига умид уйғотмоқда.

Эронликлар қийин гуруҳда имтиҳон қилинишларини билсалар-да, Ҳамид Эстили шогирдлари ўз олдиларига юқори мақсадларни қўйишган.

Ҳужумчи Моҳаммед Моҳебби Камбоджа миллий терма жамоасига қарши ўртоқлик ўйинида 2 та гол киритишга муваффақ бўлди. Меҳди Гаэди «Истиқлол» билан чемпионатнинг биринчи ярмида 8 та гол урган ҳолда Таиландга етиб келган. Риза Шикари ўсмирлар ўртасидаги жаҳон чемпионатида 3 бора рақиблари дарвозасини ишғол қилишга эришди.

Шунингдек, 18 ёшли вундеркинд Аллаяр Сайедманеш ўтган йилнинг июнь ойида миллий терма жамоа  таркибида гол киритиб, Эрон миллий терма жамоаси таркибида гол урган энг ёш футболчига айланди. Бундан ташқари, Туркиянинг «Фенербаҳче» клуби билан шартнома имзолаганидан 1 ой ўтиб Сурия дарвозасига ҳам йўл топди.

Абдулвосид ВАЛИХОНОВ таржимаси