Уайт ва Эдди Хирн WBC режасидан норози... Уларга Тайсон Фьюри керак

Бир неча кун аввал супер оғир вазн тоифасидаги даъвогар Диллиан Уайт WBCга қарши ҳуқуқий кураш бошлади.
WBC ташкилоти чемпион Тайсон Фьюрини даъвогар Диллиан Уайтга қарши мажбурий ҳимоя жангини 2021 йил февраль ойига қадар ўтказиш шартини қўйган эди. Аммо, ҳозирда у Деонтай Уайлдерга қарши 3-жангини йил охирига қадар ўтказиши керак бўлмоқда. Кейинчалик эса, Энтони Жошуа билан тўқнаш келиши режа қилинган. Бироқ, Тайсон Фьюри ва унинг жамоаси Уайтга қарши мажбурий ҳимоя жангига мутлақо қизиқиш билдираётгани йўқ. WBC эса, бу муаммони бартараф этиш учун "Лўлилар қироли"га "Franchayz " чемпиони мақомини бериш ва автоматик равишда Диллиан Уайтни WBC бўйича жаҳон чемпиони, дея эълон қилиш борасида режаларни муҳокама қилмоқда. Бунга Диллиан Уайтнинг промоутери Эдди Хирн ўзининг бевосита фикрини билдириб ўтди.

"Бу ҳақида Диллиан билан маслаҳатлашиб олганмиз. Бизга Фьюрига қарши жанг керак. Бу ҳолатни Ломаченко ва Хейни ўртасида ҳам кўриб, гувоҳига айландик. Хейни Ломаченко билан жанг қилиш учун меҳнат қилди ва элиминатор жангида ғалаба қозонди. Охир оқибатда эса, Ломаченко "Franchayz" чемпиони, деб эълон қилинди ва Хейни WBC чемпионига айланди. Тўғри, бу ҳам чемпионлик! Лекин биз Ломаченко билан жанг қилиб, энг нуфузли камарга эгалик қилишни хоҳлаган эдик. Якунда, бу воқеълик амалга ошиш эҳтимоли камайиб кетди. «Franchayz» мақомидаги чемпион ҳаттоки мағлубиятга учраган тақдирда ҳам ўз камарини сақлаб қолади ва бу камар мутлақо дахлиз… Ахир боксчи жанг ўтказа олмаса бундай беъманилик нимага керак? Диллиан Уайт шу даражага эришиш учун йиллар давомида меҳнат қилди. Минтақавий камарлар, саралаш жангларини ўтказди. Унга  Фьюри билан жанг керак, сохта камар эмас!",- деди Хирн IFL TV га берган интервьюсида.