Учар “баклажкалар” мамлакатига саёҳат! Норбой Муаллим Суперлигада қовун тушурганларни "пушка"га олишда давом этади.

Эндиликда SPORTS.uz Суперлига тур якунларига кўра энг “яхшилар”ни аниқлаб боради. Хўш, тўртинчи турда кимлар ўзини ёмон томондан қолганлардан кўра "яхшироқ" кўрсатди? Бизда бешта вариант бор. Матн катталашиб кетмаслиги учун қисқа ва лўнда тушунтирамиз!

5-ўрин. Шаҳзод Ғофурбеков – шул ҳам зарбаму?!

Хўш, Шаҳзод қайси кўрсатган “каромати” учун Норбой Муаллимнинг блокнотидан ўрин эгаллади? “Металлург” – “Пахтакор” баҳсининг 66-дақиқасида вазият умуман бошқа томонга бурилиб кетиши мумкин эди. Қанотдан узатиб берилган тўп, тўғри Шаҳзод Ғофурбековнинг оёқларига келиб тушди. Қаҳрамонимиз эса на зарба йўллади, на тўпни ўзига бўйсундирди.

Соддароқ қилиб айтганда, профессионал футболчига ярашмайдиган беўхшов ҳаракати билан имкониятни йўққа чиқарди. Агар бу эпизодда “маъданчилар” ҳисобни тенглаштира олганида, якунда очко ишлаб олишлари ҳеч гап эмас эди. Сабаби, бу вазиятга қадар нисбатан ўйин тенглашган, “шерлар” анча куч йўқотгани сезилаётганди. Соддароқ қилиб айтсак, баҳсда бурилиш нуқтасига айланган эпизод антеқаҳрамони – Шаҳзод Ғофурбеков!

4-ўрин.  Азиз Амонов – “Кўринмас одам”

Амонов деган йигитни эшитганмисиз? У Эрондан келди “Насаф”га. Уни ОЧЛда ўйнай олмаслигини эшитиб, “аждарлар” роса хафа бўлишган, ҳатто у бўлганида бу ўйинни ютар эдик, дегувчилар ҳам чиқди орамиздан) Амалда эса…

У ўзи ҳужумчими? Хўп, майли ҳужумчи эмасдир, ҳеч бўлмаганда футболчими? Баҳсни томоша қилган бўлсангиз, Амонов 5 та имкониятга эга бўлганига гувоҳ бўлиш мумкин. Ҳатто, Жавоҳир Сиддиқов темпга тушиб, тўп учун курашяпти. Амонов эса ўзини Эрондан келганини ҳали англамаган кўринади.

Амонов иккинчи қаватда бирорта аниқ зарба йўлашни, бўш ҳудуд очишни уддалай олгани йўқ. Кейин Лима ўйинга қўшилди. Ҳужумчи ортига ўтиб, бироз эркинроқ ҳаракат қилади десам, аксинча йўқ бўлиб қолди. Ўзи, Амоновнинг майдондаги позицияси захирада ўтириш, чоғи. Йигитча Ҳусаин Норчаевнинг, ҳатто захирадаги ўрнини ҳам тўлдира олмайдигандек кўриняпти. Норчаев баъзан иккинчи бўлимда ўйинга қўшилиб, темпни кўтарганини кўрганмиз. Амонов эса ўзини излаяпти. Бу кетишда топа олмай, “Насаф” дарвозасининг ташқи томонига чиқиб қолиши ҳеч гап эмас.

3-ўрин. “Сўғдиёна” ҳимоя чизиғи – Бир мураббийнинг “бошига” етган йигитлар

Вай, вай вай… Бу ҳимоя чизиғининг “Навбаҳор” билан ўйинини таҳлил қилар экансиз, ҳимоячиларни  Ёрқин Назаровда қасди бор, деб ҳам ўйлаб қолиш мумкин. Тўғри, рақиб жуда кучли эди, аммо ортда қолган 4 ўйиндаги хатолар жамланса, кўзингиздан олов чиқиб кетиши аниқ. Майли, биз 4-турдагиси билан қаноатланамиз.

Биринчи ўтказилган гол:

Колакович майдондаги рақибни, тўпни ва ҳатто, ўзини йўқотиб қўйди. Натижада, рақиб марказий ҳимоячиси жуда содда вазиятда гол келтириб, “қарши ҳужумга таяниш” услубини белига тепди.

Иккинчи гол: икки қават блок бўлиб жойлашган мудофаа чизиғини “лочинлар”нинг атиги 2 футболчиси кўрмай ўтиб кетди. Бонусига, дарвозабоннинг чиқиб келиши ҳам “капейка”, яъни, фойда бергани йўқ.

Учинчи гол: Майдон марказида тўп йўқотилгач, ҳимоя чизиғи 3-3 ҳолатда жуда тартибсиз ортга чекинишни амалга оширди. Ваҳоланки, майдонни каттароқ қисмини эгаллаш учун кенгроқ жойлашиш мумкин эди. Қарабсизки, Искандеровдан Жўрабековга (у қанот ҳимоячиси, мабодога) пас.

Эътибор қилган бўлсангиз, Шаҳбозда тўпни тўхтатиб, рақиб дарвозасини нишонга олиб, бир пиёла чой ичиб олишга ҳам етгулик вақт бор эди.

Қисқаси, Намангандаги ўйинда “Сўғдиёна” ҳимоя квартети Ёрқин Назаровни “чопилиб кетишига” қўлидан келганича ҳисса қўшди.

2-ўрин. Рўзимбой Аҳмедов – “Талпа”даги Рокки Балбоа!

Хоразмлик страйкер - Ўзбекистон футболининг миридан-сиригача биладиганлар тоифасидан.Пастки лигаларда хизмат кўрсатган форвард, айни дамда “Бухоро”нинг суянган тоғларидан бири бўлиб турибди. Майли, ўйинга қайтамиз. Ҳисобда ортда бораётган Фузайлов 57-дақиқада Рўзимбойни “жангга” ташлади. Орадан 15 дақиқаларча вақт ўтмай туриб, ўзгариш ўз сўзини айтди! Қизил карточка. Ўзи жамоанг ортда боряпти, ўйини чиқмаяпти, стандарт вазият ижро этилиши арафасида ҳам фол ишлатадими?

Гол уришдан кўра, рақиб юзига тала-топурда сезилмайдиган қилиб мушт туширишга нима бор? Майли, ёшроқ футболчи бўлса, провокацияга учибди, деб оқласак. Аҳмедов кўрган нарсаларни китоб қилса, 1 миллион тиражда сотиладику! Менимча, шундай китоб чиқса, муқовасида Илҳом Мўминжоновнинг сурати бўлса керак. Ийе, узр. Ўтлаб кетдим. Қисқаси, Хоразм ўғлони ўринсиз “катталик” қилгани учун жамоасини оғир аҳволда қолдириб кетди.

1-ўрин. "Навбаҳор" мухлислари – “Учар баклажкалар мамлакатида”

Муборак Рамазон ойида оғиз  очиб олиши учун ишқибозларга сув идишлари билан ичкарига киришга рухсат берган клуб қилган ишидан пушаймон бўлгани аниқ. Кимдир сув ҳакамга эмас, Станислав Андреевга отилди, деб ишқибозларни оқлаши шунчаки кулгили. Темур Тўхтасинов қанчалик уддабуронлик қилмасин, вазият хунуклигича қолгани ёқимсиз факт!

“Лочинлар” ишқибозлари бугунги замонавий ўзбек футболининг бир қисмига айланиб бўлди. Худди Миржалол Қосимовнинг жарима зарбалари,  Одил Аҳмедовнинг куюнчаклиги,  Акмал Шораҳмедов ўз дарвозасига урган голини билгандек, барча Наманган аҳлининг қандай даражада “Навбаҳор”га ишқибозлик қилишини билади.

Афсуски, айрим кичик деталлар катта ютуқларни ҳам хунук стереотипларга айлантириб юбориши мумкин. Мана шуниси ёмон! Яъни, ўзбек футболи деганда, яна Қосимов, Аҳмедов ва қўлига тушган нарсани майдонга улоқтираётган “Навбаҳор” ишқибозлари кўз ўнгимизда гавдаланиб келавериши эҳтимоли юқори! Исми ёдимдан кўтарилган ёзувчи айтганидек: “Бизни қандай ёдга олишлари доим ўз қўлимизда!”.

Бугунги “ТОП-5”да биринчиликни жамоаси 3:0 ҳисобида ғалаба қозонаётганига қарамай, майдонга нарса улоқтиришдан ўзини тия олмаган ишқибозларга берсак, ҳеч ким хафа бўлмаса керак.

Норбой Муаллим