Улуғбек Мирзаев: «Терма жамоа клубимизга панд берди»

«Қалдирғочлар» директори Улуғбек Мирзаев сайтимиз учун экслюзив интервью берди. Ушбу суҳбатда клубнинг молиявий аҳволи ва келажакдаги режалар ҳақида сўз боради.

-Нега МИБ томонидан клуб автобуслари ҳаракати тўхтатилди?

- Бу жамоамизнинг собиқ устози – Сергей Лушан билан бўлган суд жараёни сабабли амалга ошди. Мураббий 2015/2016 йилги мавсумда олмаган маошлари ва кўтарма пуллари учун бизни фуқаролик судига берди. Унинг бошқарувидаги «Бунёдкор» ОЧЛда иштирок этган эди. Гуруҳ баҳсларида омадсиз тўп сурган бўлса-да, аввалги раҳбарлар томонидан жуда катта кўтарма пуллари ёзилган. Ишдан кетгач, Сергей бир неча йилдан сўнг, ишни судга оширди. У Россия фуқароси. ФИФА ёки Спорт арбитраж судига шикоят қила олмас эди. Буни яхшилаб ўйлаб қилгани аниқ. Сабаби, Спорт суди 2 йилдан ўтиб кетган ишларни кўриб чиқмайди. Лушан буни билган ҳолда фуқаролик судига ариза берган.Оқибатда, суд 750 миллион сўмнинг ярмини тўлашимиз шартлигини маълум қилди.

- Нима деб ўйлайсиз, Вадим Абрамовнинг терма жамоага жалб этилгани, клуб ўйинларига таъсир кўрсатдими?

- Албатта, панд берди. Терма жамоа йиғинлари пайтида Вадим Карленович машғулотларда иштирок эта олмади. Шу боис, чемпионатда очко йўқотишга мажбур бўлдик. Бош мураббий йўқ пайтда, катта мураббий йигитлар билан машғулотларда иштирок этди. Барибир у бош мураббийнинг ўрнини эгаллай олмайди. Қайсидир маънода, терма жамоага Вадим Абрамовнинг тайинлашини бизга панд бериб қўйди. Агар у биз билан бўлганида, чемпионатни иккинчи поғонада тугатишимиз ҳам мумкин эди.

- Сизни жамоани тарк этганингизда, клуб ҳисобида 350 минг доллар ва 500 миллион сўм бор эди. Қайтиб келганингизда, бу пуллар жойида эдими?

- Мен келганимда, Жасур Жалолиддиновнинг трансферидан келиб тушган 350 минг евро ўз ўрнида эди. Сарф-харажатлар учун 500 миллион евро сарфланган эди. Қайтиб келганимдан сўнг, 100 минг долларни расамади билан сарфладик. Қолганини керакли жойларда ишлатиш учун ҳисоб рақамимизда ушлаб турибмиз.

- Нима деб ўйлайсиз, шахсий клуб саналган «Турон» Суперлигада қандай иштирок этади?

- Мен «Турон»нинг ўйинларини кузатдим. Ўйлашимча, улар барчага бош оғриқ бўлиши аниқ. Катта эҳтимол билан, клуб Суперлигада бемалол жон сақлаб қолишга қодир.

- «Бунёдкор» уй учрашувларини ўтказиши учун қурилган аренанинг чими неча йиллардан бери тартибга солингани йўқ. Бунга қарши қандайдир чора-тадбирлар кўриляптими?

- Бу саволдан қочмоқчи эмасман. Бир неча йиллардан бери ўзимиз ҳам қизиқиб мутахассислар билан фикр алмашяпмиз. Кимдир тупроқ қисмида, кимдир усти ёпиқ бўлгани учун қуёш нури тушмаслигини важ қилиб кўрсатади, яна кимдир ҳаво яхши айланмаслиги муаммога сабаб бўлгани ҳақида айтмоқда. Ҳозир ҳаво айланиши учун бунёд этилган 20 га яқин чиқиш йўлагини очиб қўйганмиз. Панжаралар ёрдамида уни тўсганмиз, аммо ҳаво айланиши йўлга қўйилган. Ҳозир араб мутахассислари шу масалада иш олиб бормоқда. Улар майсанинг илдизини 15 см ўстиришга қодир кимёвий воситалардан фойдаланмоқда. Уларнинг айтишича, илдиз маҳкам бўлса, чим қўпорилиб кетмайди. 10 март санасида биринчи учрашувимиз бўлиб ўтади. Чим устида меҳнат қилдик. Умид қиламанки, майдоннинг ҳолати бизни уялтириб қўймайди.

- 10 йил аввалги Ўзбекистон чемпионати билан ҳозиргисини солиштиринг. Қай бири кучлироқ эди?

- Менимча, ҳозирги чемпионат кучлироқ. Сабаби, ташкилий жиҳатларда ўсиш кўзга ташланди. Барча ўйинлар телеэкранларда намойиш этилмоқда. Бундан 10 йил илгари Европа футболи ҳақидаги маълумотлар ва учрашувларнинг телетрансляцияси камлиги сабабли мухлислар ички биринчиликка кўпроқ эътибор қаратган. Ҳозир, кучли бешлик жамоалари иштирокидаги ўйинларни томоша қилгач, ўзимизнинг футболга бўлган эътибор камайиб кетди. Мухлислар авваллари чемпионатимизда юлдузлар кўп эди, деб ўйлаши мумкин, аммо мен бу фикрга қўшилмайман. Юлдузлар ҳозир ҳам бор, бироқ Месси, Салоҳ сингари мегаюлдузларнинг савияси билан ўзбек футболчиларини солиштириш бошланди. Мухлислар сони камайган бўлса-да, ички биринчилик анча кучайди. Бу йил чемпионат янада қизийди.

- Шахсий жамоа ҳозир фойда билан мавсумни якунлаши мумкинми?

- Давлат пулини клублар камроқ ишлатиши керак, дейилмоқда, аммо бунинг имкони йўқ. Трансляциялардан ҳеч қандай пул келиб тушмайди, майдон атрофидаги 44 та реклама шитларининг ярми ПФЛ томонидан банд қилинган. «Coca Cola» бизнинг стадионларда ўз банерларини ўрнатади, футболкаларда ўз брендини акс эттиради, аммо клубларга бундан ҳеч қандай наф йўқ! Ҳеч қандай мукофот пуллари ҳам йўқ, бироқ бадал пуллари бор. Ўзимизни ўзимиз таъминлашимиз керак деймиз, аммо яна қандай йўл билан клублар даромад олиши мумкин. Юқорида даромад олиш мумкин бўлган барча омиллар ПФЛ тасаруффида экан, биз қандай қилиб ўзимизни ўзимиз эплашимиз мумкин. Яқинда «Pepsi» бизга шартнома таклиф қилди, аммо ПФЛ газли ичимликлар билан ҳамкорлик қилишга рухсат бермайди. Ушбу компания «Coca Cola» билан рақобатлашгани учун яхши сумма таклиф этган эди. Клубларни ривожлантириш ҳақида гап кетар экан, масалани бу томонларини ҳам ўйлаб кўриш керак. Лигани янада сердаромад қилиш керак. Битта «Coca Cola»нинг пулига қараб қолиш керак эмас. Каттароқ даромад олайлик ва клубларга ҳам бундан улуш келиб тушсин.

- Агар бадал пули олиб ташланса, бу клубларга қай даражада ёрдам бўлади?

- Ҳозирга келиб, бадал пуллари клубларга катта таъсир кўрсатади. Биргина хорижлик футболчини рўйхатдан ўтказиш учун 40 миллион сўм тўлаш лозим. Бир мавсум учун тахминан бадал пуллари 600 миллион сўмни ташкил этади. Ҳозир ПФЛ клубларга истаганича ҳомийлар билан ишлашга рухсат бермоқда. Секин-аста яхши ўзгаришлар бўлмоқда. Тез орада, ҳаммаси ўз ўрнига тушиб кетишидан умидвормиз.