Машарипов Ўзбекистон – Португалия ўйини олдидан Роналдуга мурожаат қилди
Ўзбекистон миллий терма жамоаси ярим ҳимоячиси Жалолиддин Машарипов жаҳон чемпионати гуруҳ босқичи иккинчи тур доирасидаги учрашув олдидан Португалия терма жамоаси юлдуз ҳужумчиси Криштиану Роналдуга мурожаат қилди.
Футболчи ўзининг инстаграм саҳифасида Саудия Арабистонининг «Ан-Наср» клубида бирга тўп сурган даврлардан қолган, Роналду билан тушган архив суратни жойлаштирди.
- Дўстим, жаҳон чемпионатида кўришгунча, — деб ёзди Машарипов ва постда Роналдунинг расмий саҳифасини белгилаб ўтди.
Эслатиб ўтамиз, 2026 йилги футбол бўйича жаҳон чемпионати АҚШ, Канада ва Мексика майдонларида ўтказилмоқда. Ўзбекистон терма жамоаси ўз тарихида илк бор мундиалнинг ҳал қилувчи босқичига йўл олди ва дебют учрашувини Колумбияга қарши ўтказди. Мазкур беллашувда ўзбекистонликлар 1:3 ҳисобида мағлубиятга учради.
Криштиану Роналду бошчилигидаги Португалия терма жамоаси эса, биринчи турда Конгт Деомократик Республикаси футболчилари билан 1:1 ҳисобида дуранг ўйнади. Бу натижадан кейин Роналду танқид остида қолди.
Жалолиддин Машарипов дўсти Роналду билан майдонда тўқнаш келмайди. Тажрибали футболчимизда 16 июнь куни умуртқа поғонасида диск чуррасининг қайталаниши сабабли расман жаҳон чемпионати учун терма жамоанинг якуний рўйхатидан чиқарилди.
Ўзбекистон футбол ассоциацияси футболчининг тиббий ҳужжатларини ФИФА қўмитасига тақдим этди ва ташкилот мажбурий алмашувни расман маъқуллади.
Натижада 26 нафар футболчидан иборат рўйхатда жароҳат олган ярим ҳимоячи ўрнини ҳужумчи Русланбек Жиянов эгаллади.
Жаҳон чемпионати гуруҳ босқичидаги Ўзбекистон – Португалия учрашуви 23 июнь куни АҚШнинг Хьюстон шаҳрида жойлашган «Хьюстон Стэдиум» (NRG Stadium) аренасида бўлиб ўтади. Ўйин Тошкент вақти билан 22:00 да бошланади.
Фикрлар