Роналду Ўзбекистонга қарши ўйин олдидан баёнот берди
ФИФА тарихида илк маротаба уч мамлакат - АҚШ, Канада ва Мексика мезбонлик қилаётган жаҳон чемпионати тобора қизғин паллага кириб бормоқда. Мундиални тарк этадиган дастлабки мамлакатлар ва кейинги босқичга йўл олган омадли жамоалар номи аниқланди.
Гуруҳ босқичидаги иккинчи тур баҳслари орасида футбол жамоатчилигининг эътиборини кўпроқ ўзига жалб этаётган ўйин "К" гуруҳида бўлиб ўтади.
Унда футбол ҳамжамияти учун имкониятлари махфий бўлиб турган Ўзбекистон миллий терма жамоаси аслида турнир фаворити ҳисобланган, бироқ дастлабки турда ўз салоҳиятини кўрсата олмаган Португалия юлдузлари билан тўқнашади.
Айни пайтда футбол экспертлари, мутахассислар, футболчилар бўлажак ўйин ҳақида ўз мулоҳазаларини билдирмоқда. Бу учрашувга қизиқишнинг кучайиб бораётганига сабабчилардан бири Криштиану Роналдудир.
Худди Лионель Месси каби жаҳон чемпионатларида олтинчи маротаба иштирок этаётган португалиялик юлдуз катта футболда қўлга киритмаган биргина соврин - жаҳон кубоги қолган. Шимолий Америкадаги мундиал Роналду учун сўнгги имконият. Чунки 41 ёшли Криштиану кейинги мусобақани яна тўрт йил кутишига ҳеч ким ишонмайди.
Қолаверса, Роналду биринчи турдаги ўйинидан кейин танқидлар остида қолиб кетди, бош мураббий Роберто Мартинесдан Ўзбекистон билан бўладиган учрашувда ёши ўтган футболчини захирада қолдириб, шижоатли ёшларга имкон беришни талаб қилганлар ҳам кўпчиликни ташкил қилмоқда.
Аммо Криштиану Роналдунинг ўзи терма жамоадаги мутлақ ваколатларидан фойдаланиб, ҳар бир учрашувда тўлиқ ўйнашга бел боғлаган.
Португалия миллий терма жамоаси таркибида 230-ўйинини айнан Ўзбекистонга қарши ўтказишга тайёрланаётган Криштиану Роналду бу баҳс олдидан ижтимоий тармоқдаги саҳифаси орқали баёнот бериб, мухлисларга мурожаат қилди.
- Бор эътиборимиз зиммамиздаги вазифамизга қаратамиз!, — деб ёзди Криштиану Роналду Instagram тармоғидаги саҳифасига машғулот пайтида туширилган бир неча суратларни намойиш қилиш билан бирга.
"ЖЧ-2026" гуруҳ босқичи иккинчи туридан ўрин олган Португалия — Ўзбекистон учрашуви 23 июнь куни бўлиб ўтади. Ўйин Тошкент вақти билан соат 22:00 да старт олади.
Ҳамманинг эътиборида турган бу баҳс АҚШнинг Хьюстон шаҳридаги ҳашаматли стадионда ўтказилади.
Эслатиб ўтамиз, мусобақанинг илк турида португалияликлар кутилмаганда Конго Демокрактик Республикаси терма жамоаси билан 1:1 ҳисобида дуранг ўйнади. Фабио Каннаваро бошчилигидаги Ўзбекистон миллий терма жамоаси мундиалдаги дебют ўйинида Колумбия футболчиларига 1:3 ҳисрбида имкониятни бой берди.
Фикрлар