Умид Боқиев: "Про лигага ҳаракатимиз бор"

“Қўқон-1912” – “Дўстлик Олтиариқ” (4:1) учрашувидан кейин меҳмонлар бош мураббийи Умид Боқиев матбуот анжуманида қатнашди.

- Бугунги ўйинга қўлдан келганича йигитларни тайёрладик. “Қўқон-1912” Суперлига жамоаси. Кучли ўйин бўлишини билардик. Бошида тезкор гол ўтказиб юбордик. Кейин биз ҳам гол уриб, мувозанатни тиклашга ҳаракат қилдик. Биринчи бўлимда футболчилар қўлдан келганича яхши ҳаракат қилди. “Қўқон-1912” Суперлигада ўз мавқеига эга. Йигитлар рўза бўлишига қарамай, иккинчи бўлимда ҳам имкони қадар фаоллик кўрсатди. Захирадан майдонга тушган футболчилар ишончни оқлашмади. Иккинчи бўлимда ўйинга қўшилган ўйинчиларимиз ёшлик қилди. Тажриба етишмади.

Саид Абдужабборов билан Шоҳруҳ Холматовни олиб қолишга ҳаракат қилдик. Уларга яхши жамоалардан таклифлар бўлди. Маблағ масаласида ҳам ҳали барқарорликка эга эмасмиз. Шу боис уларни қўйиб юборишга мажбур бўлдик. Моддий жиҳатдан ҳали шаклланмаганмиз. Ҳокимият ва ҳомийларимиз қўлдан келганича ёрдам беришяпти.

Бизни мақсадимиз ҳар бир учрашувда ғалаба қозониш. Олдимизга биринчи лигада кучли учталикка кириш вазифасини қўйишди. Про лигага ҳаракатимиз бор, ҳаммаси ўз қўлимизда.

Сафимизда Оқил Маҳмудов, Мўйдин Мамазулумов каби тажрибали ўйинчилар бор. Асосан ёшларга ишонч билдиряпмиз. Қўқонда, Яйпанда ўйнаб кетган футболчилар бор. Ёшларни Суперлига ва про лига жамоаларига тайёрлаб беришни мақсад қилганмиз, - деди Боқиев.