Уни ҳайдаб хато қилманг! Гвардиола рақиб жамоадаги ҳамкасбини ҳимоя қилмоқда

“Манчестер Сити” бош мураббийи Хосеп Гвардиола  Англия лигаси кубоги учрашувида “Арсенал”ни 4:1 ҳисобида мағлуб этганидан кейин, рақиб бош мураббийи Микель Артетани ҳимоя қилиб чиқди.

- Артетани бўшатиш катта хато бўлади. Унга ишонишда давом этиш керак. Албатта, натижаларга қаралади. Лекин мен Микелни узоқ йиллардан бери биламан ва у савияли мураббий эканига ишонаман. У “Арсенал”ни қабул қилиб олганига кўп бўлгани йўқ ва унга имконият бериш лозим. Ўтган мавсумда иккита совринни ютганини унутманг, - деди Гвардиола.

Артета “канонирлар”ни ўтган йилнинг ярмидан бошқара бошлади. Жамоа унинг қўл остида Англия кубоги ва суперкубогини қўлга киритди. Янги мавсумда эса “тўпчилар”нинг ўйини қовушмаяпти.