Усикнинг супер оғир вазндаги дебюти омадли чиқди

Ҳозиргина АҚШнинг Чикаго шаҳрида якунланган Александр Усик ҳамда Чазз Уизерспун ўртасидаги жанг якунланди. Дастлабки раундларданоқ украиналик боксчи ташаббусни қўлига олишга ҳаракат қилди. У оёқларидаги фаол ҳаракатлари эвазига, биринчи ва иккинчи раундларда бир нечта аниқ зарбалар йўллади. Ўз ўрнида Чазз ҳам бу раундларда муносиб ҳимоя билан бирга қарши ҳужумлар уюштириб турди. Учинчи ва тўртинчи раундлар ҳам шу тарзда давом этди. Фақат боксчилар бироз фаоллашди. Чазз ҳам хавфли зарбалар йўллай бошлади. Усик асосан узоқроқ масофадан жанг олиб боришни мақул кўрди. Албатта бу тўғри танланган тактика эди. Чунки яқин масофада Чаззнинг кучли зарбалар йўллаш эҳтимоли кўпроқ бўлган бўларди. Бешинчи раундга келиб, Усик рингда ўз ҳокимлигини тўла-тўкис ўрнатди. Унинг ўнг қўлидаги "жеб" зарбалари ва "комбинация"лари аниқ кўриниш ола бошлади. 6-раунд сўнгида украиналик боксчи бир нечта кучли ва аниқ зарбалар йўллади. Фақатгина бонг АҚШликни қутқариб қолди. 7-раундда Чаззда чарчоқ аломатлари сезилди. Оқибатда жуда кучли зарбаларни ўтказиб юборди. АҚШлик боксчи асосан битта зарбани ўйлаб, рингда ҳаракат қилди. Шунчаки яккалик "кросс" зарбасига таянди ҳолос. 7-раунддаги ҳолатидан келиб чиқиб, Чаззнинг мураббийлари 8 -раундга чиқишини мақул кўришмади ва тўғри қилишди. Чунки, аста-секин ушбу жанг нокаутга қараб кетаётган эди. Хуллас, Александр Усикни супер оғир вазндаги дебюти омадли чиқди.