V Ислом бирдамлиги ўйинларида қаҳрамонлик кўрсатган спортчиларимизнинг тренерлари ҳам рағбатлантирилди

Бугун Спортни ривожлантириш вазирлигида Ўзбекистон Республикаси Президентининг 2022 йил 18 августдаги 355-сонли қарорига мувофиқ, V Ислом бирдамлиги ўйинларида ғолиб ва совриндор бўлган спортчиларнинг мураббийларини тақдирлаш маросими ўтказилди. Бу ҳақда вазирлик матбуот хизмати хабар тарқатмоқда.

Хабарингиз бор, “Конья шаҳрида (Туркия) бўлиб ўтган V Ислом бирдамлиги ўйинларида ғолиб ва совриндор бўлган спортчилар ҳамда уларнинг тренерларини бир марталик пул мукофотлари билан рағбатлантириш тўғрисида”ги Президент қарори имзоланган эди. Қарор ижросини таъминлаш мақсадида бугун ғолиб ва совриндор спортчиларимизнинг мураббийларини ҳам тақдирлаш маросими ташкил этилди.

Тақдирлаш маросимида Ўзбекистон Республикаси Спортни ривожлантириш вазири Адхам Икрамов, вазирлик ҳамда Миллий олимпия қўмитаси раҳбарияти иштирок этди. Маросим аввалида вазир А.Икрамов спортчиларимизнинг қўлга киритган ютуқлари ва уларнинг замирида мураббийларимизнинг хизматлари беқиёс бўлганлигини таъкидлаб ўтди.

Шундан сўнг, Туркияда ўтказилган V Ислом бирдамлиги ўйинларида ғолиб ва совриндор бўлган спортчиларнинг мураббийларига пул мукофотлари тантанали равишда топширилди.

Эслатиб ўтамиз, V Ислом бирдамлиги ўйинларида Ўзбекистон умумжамоа ҳисобида 2-ўринни эгаллади. Мазкур мусобақада спортчилармиз 51 та олтин, 42 та кумуш, 65 та броньза, жами 158 та медальни қўлга киритишди. Бу Ўзбекистон спорт делегатсияцсининг комплекс мусобақалардаги энг юқори натижаси сифатида тарихга кирди.