Вадим Абрамов "Динамо"да Андрей Шипиловнинг натижасини такрорлади. Вазият жиддий

“Динамо” жамоаси кеча сафарда “Нефтчи”га йирик ҳисобда мағлубиятга учради ва Суперлигада қолиш имкониятини янада мураккаблаштириб юборди. Бош мураббийликка Вадим Абрамов келганидан сўнг ҳам вазият ўзгармади. Чунки жамоа Вадим Карленович бошчилигида ҳали ғалаба қозонгани йўқ. Натижа қуйидагича: 5 та ўйин, 1 дуранг ва 4 мағлубият.

ЎзПФЛ матбуот хизмати қизиқ статистикани ҳавола қилди. Унга кўра, “Динамо”да Абрамовдан олдин ишлаган собиқ бош мураббий Андрей Шипилов ҳам айнан 5 та ўйин ўтказган бўлиб, унинг натижалари Абрамовники билан бир хил: 5 ўйин, 1 дуранг ва 4 мағлубият. Фақат тўплар нисбатида кичик фарқ бор. Шипилов даврида 5 та гол урилган ва 9 та тўп ўтказилган. Абрамовда эса бу кўрсаткич 5-13.

Олдинда 7 та тур қолди. “Динамо” 8 очко билан сўнгги ўринда. Ундан бир поғона юқорида турган “Сурхон” ҳисобида 16 очко бор. Бу йил Суперлигани иккита клуб тўғридан-тўғри тарк этишини ва 12-ўрин эгаси про лигада 3-ўрин соҳиби билан плей-оффда куч синашишини инобатга олсак, “Динамо”нинг кейинги тақдири ойдинлашиб қолмоқда...