Вадим Абрамов: "Григалашвили билан битимни бекор қилдик, чунки..."

Суперлигага қайтиш учун курашаётган Самарқанднинг “Динамо” жамоаси бу вазифани бош мураббий Вадим Абрамов билан бирга амалга оширишга бел боғлаган. Ҳозирча клуб турнир жадвалида “Локомотив”дан сўнг 2-ўринда боряпти.

Албатта, “Динамо”ни яна кучлилар орасига қайтиши учун тажрибали футболчилар бор. Лекин куни кеча улардан бири клубни тарк этди. Гап грузиялик легионер Элгужа Григалашвили ҳақида кетмоқда. Ўтган йилдан бери “Динамо” учун тўп суриб келаётган футболчи кутилмаганда самарқандликлар сафидан кетди. Вазиятга ойдинлик киритиш учун “Динамо” устози Вадим Абрамов билан боғландик.  

“Биз Григалашвили билан ҳар томонлама келишган ҳолда ўртадаги битимни бекор қилдик. Уни ушлаб қолишдан ҳеч қандай мантиқий қарор ҳам кўрмадик. Чунки футболчи Суперлигада тўп суришни истаяпти. Бунинг бор сабаби шу.

Унинг жамоадан кетиши биз учун катта йўқотиш бўладими? Буни вақт кўрсатади. Қолаверса, тез орада ёзги танаффус бошланяпти ва биз унинг позициясида тўп сурадиган бошқа футболчини рўйхатга жалб этишимиз мумкин бўлади”.

“Динамо”нинг яна бир легионери Жоэль Кожо эса илк бор Қирғизистон терма жамоасига чақирилди. Абрамов тўпурар ҳужумчиси ҳақида шундай деди:

“Ҳа, бу легионеримиз миллий терма жамоасига чақирилди ва у Эронга қарши ўтадиган учрашувда иштирок этади. Кожонинг ўрнига бошқа легионер келиши мумкинми? Нега мумкин бўлмасин? Унга айнан қайси клублардан харидорлар бўлаётганини айтишим қийин. Бизда бир легионер бор, вақт кўрсатади. Ўшанда ҳаммасини билиб олиш мумкин бўлади”.

“Динамо” охирги турда “Ғиждувон”га қарши учрашувда қимматли икки очкодан маҳрум бўлди. Ҳолбуки, учрашувдан аввал кўпчилик “Динамо”нинг ғалабасини кутганди, аммо бундай бўлиб чиқмади. Абрамов эса ўша дуранг ҳақида ҳам тўхталди.

“Ғиждувон” билан ўйинда қимматли очколарни бой берганимиз мени хафа қилгани рост. Биласизми, негадир охирги уч учрашувда ҳакамлик масаласи борасида биз кўп панд еб қоляпмиз. Чунки бизнинг ўйинларда ВАР тизими йўқ. Боз устига телевизор орқали ўйинларимизни намойиш қилишмайди. Фақат ўйиндаги қандайдир лавҳаларни Ютуб орқали кўриш мумкин бўлади. Бундай вазиятдан қандай қутулиб кетиш борасида энди обдон ўйлаймиз”.

Биринчи давра ҳам якунига етяпти ва тез орада ёзги трансфер бозори бошланади. Бу пайтда “Динамо”нинг режалари қандай бўлади? Вадим Карленовичнинг жавоби қуйидагича:

“Футбол шундай ўйинки, унда жамоа қайси ўринда бормасин ўз имкониятидан келиб чиққан ҳолда таркибни кучайтириш пайида бўлади. Биз ҳам бундан мустасно эмасмиз. Ёзги трансфер бозори чоғида албатта таркибга кимларнидир олиб келишимиз эҳтимолдан ҳоли эмас. Чунки бугунги таркибда футболчиларнинг қайси биридир ўзини кўрсатган бўлса, яна қайси бирларидир кутилган даржада ўйин кўрсата олмади. Футболда селекциядан ҳеч қачон воз кечиб бўлмайди”.

Шуҳратбек Жўраев.