Вадим Абрамов юқори баҳо берди, Александр Хомяковчи?

Тошкентдаги “Бунёдкор” академияси майдонида “Андижон” ҳамда “Динамо” жамоалари иштирокида назорат учрашуви ўтказилди. Суперлига ва про лига клублари ўртасидаги ўйинда биттадан гол урилди.

Аввалига биринчи бўлимда Баҳордир Абдувалиев “Динамо”ни ҳисобда олдинга олиб чиққан бўлса, танаффусдан сўнг Шохруҳ Маҳмудхожиев ҳисобни тенглаштирди. Айтиш мумкинки, у чемпионатни “Динамо”да якунлаганди ва бу сафар собиқ жамоаси дарвозасини ишғол қилди.

Иккала жамоа мураббийлари таркибдаги кўплаб футболчиларни синовдан ўтказдилар. Шу билан “Андижон”нинг Дукент йиғини ниҳоясига етган бўлса, “Динамо”нинг пойтахтда олиб бораётган ўқув-машғулот жараёни давом этяпти.

“Андижон”: Элдор Адҳамов, Ильдар Маматказин, Владимир Бубанья, Абдувоҳид Ғуломов, Абдулатиф Ойбеков, Муҳаммадкарим Тоиров, Илҳом Абдуғаниев, Сардор Абдунабиев, Сардор Азимов, Суҳроб Бердиев, Шаҳбоз Эркинов.

Захирадан майдонга тушганлар: Сардор Хурсандов, Илҳом Алижонов, Ислом Маматказин, Асилбек Айсаров, Иброҳим Ғанихонов, Шохруҳ Маҳмудхожиев, Бобур Фарҳодов, Жамол Ҳикматов, Фарҳод Соҳибжонов, Изззат Абдулҳақов, Оятилло Обиджонов.

"Динамо": Фарҳод Раҳматов, Эркин Байдуллаев, Бобур Мамадаминов, Комил Шарофутдинов, Хуршид Убайдуллаев, Абдужамол Исроилов, Элгужа Григалашвили, Францис Нарх, Жасур Қурбонов, Хазрат Турсунқулов, Баҳодир Абдувалиев

Учрашув якунланганидан сўнг ҳар иккала жамоа устозларининг фикрлари билан қизиқиб кўрдик.

Вадим Абрамов: "Майдонга тушган ҳамма ўйинчилар билан шартнома тузганмиз"

- Вадим Карленович, жамоангизнинг “Андижон”га қарши учрашуви ҳақида нима дея оласиз?

- Биринчи бўлимда тенг курашлар остида ўйнадик. Сабаби тушунарли, жисмоний юклама мавжуд. “Андижон”нинг ўйини менга ёқди, улар яхши ҳаракат қилишди, прессинг қўллашяпти ва тўғри футбол ўйнаяптилар. Биринчи бўлим ёмон бўлмади. Менимча, иккинчи бўлимда захирадан тушганлар билан ўйин ўзгариб кетди. Биринчи бўлимда иккала жамоалар яхши кўринди.

- “Динамо” сафида бир қатор янги ўйинчиларни кўрдик...

- Ҳозир бирон нарса айтиш қийин. Ҳамма ўйинчиларни кузатяпмиз, асосий таркибни аниқладик. Режа бўйича ўйинлар орқали янада аниқлаб боряпмиз. Ҳамма билиб турибди, аниқ вазифамиз борлигини. Мавсумгача ҳали вақт бор, секин-аста таркибни шакллантириб борамиз.

- Қайсидир футболчилар билан шартномалар тузилдими?

- Ҳа, деярли барча футболчилар билан шартнома тузганмиз. Айтишим мумкинки, учрашувда биринчи бўлимда майдонга тушган ҳамма ўйинчилар билан шартнома тузганмиз.

Александр Хомяков: "Туркиядаги йиғинимизда легионерлар орқали керакли жойларни тўлдиришга ҳаракат қиламиз"

- Александр Андреевич, ўйиндан қандай таассурот олдингиз?

- Қизиқарли жамоага қарши қизиқарли ўйин. Йиғинимизни якунладик, шунинг учун ҳамма нарса хайрон қолдирди, дея олмайман 20 кунни тоғда ўтказдик, об-ҳаво кўнгилдагидек ишлашга бироз ҳалақит берди. Аммо режа қилинган деярли барча ўйинларни ўтказдик. Оптимал ҳолатни қўшяпмиз ва ишимизда нимадир кўриняпти. Камчиликлар устида энди Туркиядаги йиғинимизда ишлаймиз.

- Таркибдаги янги футболчиларнинг ҳаракатлари сизни қанчалик қониқтиряпти?

- Бир қатор ўйинчиларни кузатдик, энди кимларни олиб қолишни ўйлаб кўрамиз. Позиция бўйича кучайтиришимиз керак. Туркия йиғинида легионерлар орқали керакли жойларни тўлдиришга ҳаракат қиламиз. Янги футболчилар ёмон эмас, потенциали борларини тавсия қилдим.

- Умуман олганда, бош мураббий сифатида Дукент йиғинидан кўнглингиз тўлдими?

- Ҳа, йиғиндан тўла қониқдим. Форс-мажор ҳолатини инобатга олмаганда, тўлиқ яхши ўтказдик. Майдонда ишлаш имкони бўлмади. Лекин бунинг ўрнини залда ва югуриш йўлакчалари орқали тўлдирдик. Бир сўз билан айтганда, йиғиндан қониқдим.

Шуҳратбек Жўраев.