Вальверде Неймарнинг "Барселона"га қайтиши мумкинлиги борасида ўз фикрини билдириб ўтди

"Барселона" клуби бош мураббийи Эрнесто Вальверде ПСЖ форварди Неймарнинг яна каталонияликлар сафига қайтиши борасида тарқалган хабарларга ўз муносабатини билдириб ўтди.

“Неймарнинг қайтишига келсак, нима бўлишини вақт кўрсатади. Биласиз, у ҳозир бошқа жамоа футболчиси. Мен эса “Барселона” бошқаряпман ва шу боис фақат қўл остимдаги футболчилар ҳақида ўйлайман. Улар яхши футболчилар”, - дейди испаниялик мутахассис.

Эслатиб ўтамиз, Неймар 2013-2017 йилларда “Барселона” сафида тўп сурган ва шундан сўнг 222 млн евро эвазига ПСЖга кўчиб ўтган эди.