Ван Дейк ЖЧ-2026 ўйинларидаги сув ичиш танаффусларини танқид қилди

Нидерландия терма жамоаси сардори ва ҳимоячиси Виргил ван Дейк 2026 йилги жаҳон чемпионати учрашувларида жорий этилган ичимликлар учун танаффусларни танқид қилди.

"Ҳозиргача деярли барча ўйинларни томоша қилдим ва... ҳар сафар реклама танаффуси бошланганда, бу бироз... менга унчалик ёқмади. Телевизор қаршисида ўтирган бетараф томошабинлар учун ҳам бу унчалик ёқимли эмас, деб ўйлайман. Албатта, бу танаффусларни бекор қилиш яхши бўларди, лекин ҳар бир ўйинни алоҳида ҳолат сифатида кўриб чиқиш керак, деб ҳисоблайман", — дея Виргил ван Дейкнинг сўзларини BBC келтиради.

Эслатиб ўтамиз, гуруҳ босқичидаги илк ўйинда Нидерландия Япония терма жамоасига қарши майдонга тушиб, дуранг қайд этди (2:2). Ушбу баҳсда Виргил ван Дейк ҳисобни очган гол муаллифи бўлди ва учрашувнинг энг яхши ўйинчиси деб топилди.