Виктор Кумиков: "Натижадан қониқмадим, аммо жамоанинг истиқболи бор"

Бугун Намангандаги “Навбаҳор” стадионида “Андижон” ҳамда “Турон” жамоалари Суперлиганинг 13-турида куч синашдилар. Лекин мазкур ўйинда ғолиб номи аниқланмади – 1:1.

Беллашувдан кейин “Андижон” бош мураббийи Виктор Кумиков Sports.uz сайти учун ўз фикрлари билан ўртоқлашди.

- Биз биринчи бўлимни уларнинг охирги ўйинлари каби ўтказдик. Яъни, жуда ёмон ўйин кўрсатдик. Шунинг учун танаффусдан кейин барчасини ўзгартирдик. “Андижон”га келгач, жамоа билан атига учта машғулот ўтказдик. Легионерларимиз эса бу ўйингача бор-йўғи битта машғулот ўтказдилар холос.

Бугунги натижадан қониқдимми? Албатта, йўқ. Таркибимизда йўқотишлар бор эди. Икки нафар ҳимоячимиз – Иброҳим Отахонов билан Усмонали Исмоналиевни ўрнини босадиган ўйинчилар йўқ. Улар таркибга қайтса, ҳимоямиз яна яхши кўринишга келади.

Янги келган футболчилар жамоамизга мослашишяпти. Шундай экан, “Андижон”нинг истиқболи бор ва умид қилсак бўлади, - дея ўйин хусусида муносабат билдирди, Виктор Балютович.