Винисиус Мбаппе хет-трик қилишига йўл қўймади. Вазиятга Алонсо баҳо берди

Испания чемпионатининг ўн биринчи туридан ўрин олган “Реал” ва “Валенсия” учрашувнинг биринчи бўлимида мадридликлар икки маротаба пенальти тепиш ҳуқуқига эга бўлди.

Дастлаб, 19-дақиқада белгиланган пенальтини жамоа тўпурари Килиан Мбаппе аниқ бажариб, ҳисобни очди. Орадан 12 дақиқа ўтиб, франциялик форвард ўйиндан гол урди. Шу боис, Мбаппе 44-дақиқадаги пенальтини жамоадоши Винисиус Жуниорга қолдирди. Бразилиялик юлдуз 11 метрлик белгидан гол уролмади ва амалда Мбаппени хет-трик қилиш имконидан айирди.

Учрашувдан кейин жамоа бош мураббийи Хаби Алонсо бу ҳолатга алоҳида тўхталиб ўтди.

- Мбаппе нега 11 метрлик зарбани Винисиусга қолдирди? Чунки Килианнинг ўзи бу пайтга келиб, иккита гол уриб бўлганди. Бу икки ўйинчининг ўзаро муносабати аъло даражада. Бизда жамоавий руҳият биринчи ўринда туради.

Мбаппе асосий пенальтичимиз. Бироқ айрим ҳолларда ўйинчиларнинг ўзлари ҳам тўпни ким тепишини ўзаро ҳал қилади. Менга эса, пенальтиларнинг ҳар бири голга айланиши муҳимроқ, - деди Хаби Алонсо.