Винисиус “нозик масала”ни сезиб қолди

“Реал” юлдузи Винисиус Жуниор “Қироллик клуби” билан ҳамкорлик шартномасини узайтириш борасида якуний қарорга келолмаяпти ва ўзининг Мадриддаги келажагидан шубҳаланмоқда.

Бу ҳақда машҳур “El Chiringuito” кўрсатувида маълум қилинди.

Манбанинг хабарига кўра, Винисиус илк бор “Реал” мухлисларининг бир қисми уни ёқтирмаслигини ва қўллаб-қувватламаяётганини ҳис қила бошлаган.

Бу Ла Лига доирасида мадридликларнинг “Севилья”га қарши кечган охирги ўйинида намоён бўлди. Фанатлар “Сантьяго Бернабеу” стадионида Винисиусга ўз муносабатларини ҳуштакбозлик орқали намойиш қилишди.

Винисиуснинг “Реал” билан амалдаги шартномаси 2027 йилнинг ёзигача мўлжалланган. Нуфузли Transfermarkt портали мутахассислари 25 ёшли бразилиялик футболчини 150 миллион еврога баҳоламоқда.

“Реал” ва Винисиус вакиллари ўртасидаги янги шартнома бўйича музокаралар охирги бир йил ичида турли сабабларга кўра бир неча марта тўхтатилди.