Винисиус ўзига бошқа чемпионат танлади

“Реал” ҳужумчиси Винисиус Жуниор Ла Лигани тарк этиб, фаолиятини Саудия Арабистони Профессионал лигасида давом эттиришни истаяпти.

Таниқли журналист Ромен Молинанинг маълум қилишича, бразилиялик футболчининг ўзи ва унинг яқинлари шайхлар таклиф қилаётган мўмай даромадга қизиқиб қолган.

Маълумки, Саудия Арабистони клублари 24 ёшли футболчини жаҳон футболида энг катта маош оладиган ўйинчига айлантирмоқчи.

Айни пайтда “Ал-Аҳли” жамоаси Винисиусга шартнома таклиф қилишга тайёр. Бироқ бунинг учун саудияликлар “Реал”ни трансферга кўндириши керак. Чунки ҳужумчи мадридликлар билан 2027 йилнинг ярмигача давом этадиган шартномага эга.

Transfermarkt портали Винисиус Жуниорни 200 миллион еврога баҳолаган ва бразилиялик юлдуз бугунги кунда дунёнинг энг қиммат ўйинчиларидан бири ҳисобланади.