Винисиус қилмиши учун бош эгди

«Реал» клуби ҳужумчиси Винисиус Жуниор «Вильярреал»га қарши ўйинда (1:0) майдондан четлатилгани учун жамоадошлари ва мухлисларидан узр сўради.

Учрашувнинг 72-дақиқасида бразилиялик футболчи ҳужум пайтида рақиб ярим ҳимоячиси Натан Салибанинг сочидан тортиб юборди. 

Ҳакам Исидро Диас де Мера аввалига Винисиус урган голни ҳисобга олганди, аммо видеотакрорни кўздан кечиргач, голни бекор қилди ва футболчига тўғридан-тўғри қизил карточка кўрсатди.

«Хурсандчилик давом этади… Жамоам ва мухлислар, мени кечиринг», – деб ёзди Винисиус учрашувдан сўнг.

«Реал»нинг клуб телеканали Ла Лигадаги вазиятга муносабат билдириб, чемпионатни қаттиқ танқид қилди: «Мадрид» барчага қарши ёлғиз ўзи турибди, биз бу шармандали «Негрейра лигаси»ни барибир ютамиз. «Вильярреал»га қарши 1:0 ҳисобидан кейин ҳам қаҳрамонлик ҳақида гапиришга тўғри келяпти, лекин бунга ҳакамлар олиб келмоқда», – дейилади эфирдаги чиқишда.