Volkanovski Jastin Getji va Maks Xollouey jangida kim g‘alaba qozonishini aytdi

Yarim engil vazn (65,8 kg) toifasida UFC chempioni Aleksandr Volkanovski (26-3) 13 aprel kuni Las-Vegasdagi  “UFC 300” doirasida bo‘lib o‘tadigan Maks Xollouey (25-7) va Jastin Getji (25-4) o‘rtasidagi bo‘lajak jang uchun o‘z taxminlari bilan o‘rtoqlashdi.

“Maksning afsonaviy iyagi bor. Menga ishoning, men uni buzishga harakat qildim. Agar kimdir buni qila olsa, bu Getji. Jastin og‘irroq divizionda qatnashadi va bu yigit har doim 100 % imkoniyatini ishga soladi.

Oldingi janglarda Xollouey o‘z mahoratini juda yaxshi ishga solishini ko‘rsatdi. Uning arsenalida yana ko‘plab vositalar mavjud. Shunday qilib, bizni qiziqarli jang kutmoqda. Men buni intiqlik bilan kutyapman. Agar g‘olibni tanlashga to‘g‘ri kelsa, Getji degan bo‘lardim, lekin Maksda ham katta imkoniyatlar bor”, — deya avstraliyalikning so‘zlarini keltiradi MMA Junkie.

Eslatib o‘tamiz, Volkanovski va Xollouey 3 bora to‘qnash kelgan va barchasida Volkanovski g‘alaba qozongan.