Ханчжоу-2022. Кун давомидаги спортчиларимизнинг чиқишлари, натижалари ва умумжамоа ҳисобидаги ўрнимиз (Батафсил)

Ассалому Алайкум қадрли спорт ишқибозлари. Осиё ўйинлари мусобақасининг навбатдаги кунига старт берамиз. Бугун, бир нечта ҳамюртларимиз юртимиз шарафини халқаро ареналарда ҳимоя қилади. Бугунги кун тартибидан ўрин эгаллаган спортчиларимизнинг чиқиш вақтлари билан танишинг.

Сизга қулай бўлиши учун, янгиликлар автоматик равишда шу хабар остида бериб борилади. Шунчаки, уни янгилаб турсангиз бўлгани! Кун давомида атлетларимизга омад ёр бўлишини тилаб қоламиз.

Бугунги чиқишлар ўз якунига етди! Умум жамоа ҳисобида ўз ўрнимизда қолдик!

Бугун Ханчжоу-2022 XIX ёзги Осиё ўйинларида ўзбекистонлик спортчилар 2 та олтин ва 5 та бронза, жами 7 та медалга сазовор бўлди.

Севинч Раҳимова - каратэ

Бронза

Бекзод Абдураҳмонов - эркин кураш

Жавраил Шапиев - эркин кураш

Рустам Жангабаев - оғир атлетика

Ўзбекистон эркаклар терма жамоаси - футбол

Ўзбекистон эркаклар терма жамоаси - шахмат

19:30. Бадиий гимнастика бўйича Ўзбекистон терма жамоаси аъзоси Тахмина Икромова делегациямизга навбатдаги олтин медални тақдим қилди.

Яккаликнинг кўпкураш дастурида иштирок этган юртдошимиз 131.300 балл билан энг яхши натижани қайд этди. Эслатиб ўтамиз, Париж-2024 Олимпиадаси лицензиати кеча жамоамий дастурда ҳам олтин медалга эга чиққан эди.

18:10. Шахматчи йигитларимиздан бронза медали

Шахмат бўйича Ўзбекистон эркаклар терма жамоаси Осиё ўйинларида делегациямизга навбатдаги медални тақдим қилди. Йигитларимиз жамоавий дастурда бронза медалларига эгалик қилишди.

17:00.Рустам Жангабаев икки карра Осиё ўйинлари совриндори!

Оғир атлетика бўйича Ўзбекистон терма жамоаси аъзоси Рустам Жангабаев ҳам совриндорлар қаторидан жой олди. +109 кг вазн тоифасида баҳс олиб борган юртдошимиз даст кўтаришда 190 кг, силтаб кўтаришда 233 кг, икки курашда эса 423 кг билан бронза медалига сазовор бўлди. Олтин ва кумуш медаллари Баҳрайн ҳамда Эрон вакилларига насиб этди.

15:21. 

Ханчжоу-2022: Севинч Раҳимова Осиё ўйинлари чемпиони!

Карате WKF йўналиши бўйича Ўзбекистон терма жамоаси аъзоси Севинч Раҳимова делегациямиз учун муҳим олтин медални келтирди. -55 кг вазн тоифасида баҳс олиб борган юртдошимиз финалда Хитой Таипейи вакили Суи-Пинг Куни мағлубиятга учратишга муваффақ бўлди. Баракалла, Севинч!

14:50. Футболчиларимиз 29 йил ўтиб яна Осиё ўйинлари шоҳсупасига кўтарилишди

Хиросима-1994 Осиё ўйинларидан кейин футболчиларимиз яна шоҳсупада. Ўзбекистон олимпия терма жамоаси учинчи ўрин учун кечган баҳсда Гонконгни йирик 4:0 ҳисобида мағлубиятга учратди. Шу тариқа, Париж-2024 Олимпия ўйинларига тайёрланаётган Тимур Кападзе шогирдлари Осиё ўйинларида бронза медалларига сазовор бўлишди. Мусобақа давомидаги ажойиб ўйинлар учун раҳмат, йигитлар!

14:42. Жавраил Шапиев ҳам Осиё ўйинларида совриндор бўлди

Эркин кураш бўйича Париж-2024 Олимпиадаси лицензиати Жавраил Шапиев (-86 кг) ўз шахсий совринлари коллекциясига Осиё ўйинлари медалини ҳам қўшиб қўйди. Ҳамюртимиз бронза медали учун кечган муросасиз беллашувда баҳрайнлик Магомед Шариповни мағлубиятга учратди.

14:10. Бекзод Абдураҳмонов Осиё ўйинларидаги учинчи медалини қўлга киритди

Эркин кураш бўйича Ўзбекистон терма жамоаси аъзоси Бекзод Абдураҳмонов Осиё ўйинларидаги учинчи медалини қўлга киритди. -74 кг вазн тоифасида баҳс олиб борган ҳамюртимиз бронза медали учун кечган беллашувда туркманистонлик Перман Хоммадовдан устун келди. Эслатиб ўтамиз, Абдураҳмоновнинг ҳисобида 2014 ва 2018-йилги Осиё ўйинларининг олтин медаллари бор.

13:10. Афсуски, Турсуной Жабборова умумий ҳисобда 260 кг оғирликни забт этди, аммо бу медал учун етарли бўлмади.

12:24. Синхрон сузиш. Зиёдахон Тошхўжаевадан ва Диана Онкес иборат терма жамоамиз умумий 370.5383 очко жамғард. Якунда 10 та терма жамоа орасида олтинчи натижани қайд этди. 

11:54.Афсуски, Жонибек Темиргалиев финалда 4 ўрин билан чекланишга мажбур бўлди. Буна, 2 сониялик жарима бали олгани ҳам сабаб бўлган.

11:26. Каратэ. Ҳамюртимиз Садриддин Сайматов муросасиз кечган баҳсда Қирғизистонлик Калиш Нурланбекка 4:5 ҳисобида имкониятни бой берди.

11:00. Курашчиларимизнинг бронза медали учун рақиблари маълум

Эркин кураш бўйича Ўзбекистон терма жамоаси аъзоларининг Осиё ўйинларида бронза медали учун курашдаги рақиблари маълум. Жуфтликлар билан танишинг:

-74 кг: Бекзод Абдураҳмонов – Перман Хоммадов (Туркманистон)
-86 кг: Жавраил Шапиев – Магомед Шарипов (Баҳрайн)
-125 кг: Ҳасанбой Раҳимов – Аял Лазарев (Қирғизистон)

10:30.Магомед Ибрагимов бронза медали учун ўтиш ўйинида

мўғилистонлик рақибига йири4 (4-14) натижаси билан мағлуб бўлди.

10:15. :Жавраил Шапиев аламли мағлубиятга учради. У ҳам бронза медал учун кураши давом эттиради.

10:00. Курашчиларимиз бронза медали учун баҳс олиб боришади

Бугунги беллашувларда иштирок этаётган эркин кураш бўйича Ўзбекистон терма жамоаси аъзоларининг барчаси шоҳсупага кўтарилиш имкониятини сақлаб қолди. Ярим финалда имкониятни бой берган Бекзод Абдураҳмонов (-74 кг), Жавраил Шапиев (-86 кг) ҳамда Ҳасанбой Раҳимов (-125 кг) учинчи ўрин учун баҳс олиб боришса, Магомед Ибрагимов (-97 кг) бронза медали учун ўтиш босқичида иштирок этади. Ҳамюртларимизнинг бу борадаги рақиблари яна бир неча дақиқалардан сўнг маълум бўлади.

9:48. Бекзод Абдураҳмонов ҳам бронзо медал учун гиламга чиқадиган бўлди.

09:42. Магомед Ибрагимов ўтиш ўйинида иштирок этадиган бўлди.

09:35. Хасанбой Раҳимов ярим финалда 0:2 ҳисобидаги аламли мағлубиятга учради. Энди ўтиш баҳсларида гиламга чиқади.

08:00. Севинч Раҳимова олтин медал учун жанг қилади

Карате WКФ бўйича Ўзбекистон терма жамоаси аъзоси Севинч Раҳимованинг ғалабали иштироки давом этади. Ҳамюртимиз ярим финалда жанубий кореялик Сухюн Хвангни 8:0 ҳисобида мағлуб этиб, финал йўлланмасини қўлга киритди. Раҳимова бугун кечки дастурда олтин медал учун Хитой Таипейи вакили Суи-Пинг Ку билан жанг қилади.

07:45. Жонибек Темиргалиев финалда

Байдарка слаломида эшкак эшиш бўйича ярим финал беллашувлари якунланди. Қувонарлиси, унда иштирок этган Ўзбекистон терма жамоаси аъзоси Жонибек Темиргалиев финал йўлланмасини қўлга киритди. Ҳамюртимиз 106.30 сония билан тўртинчи натижани қайд этди. Финал баҳслари бугун Тошкент вақти билан 11:20 да бошланади.

7:35. Каратэ. Севинч Раҳимова (-55 кг) нимчорак финал босқичида таиландлик Сирикамоннате Чокпрасертгул билан жанг қилди ва 1:0 ҳисобида ғалаба қозониб, чорак финалга йўл олди.

07:15.  Слаломда эшкак эшиш. Шаҳобиддин Болтабоев ҳамда Жонибек Темиргалиев иштирок этган ярим финал баҳсида Болтабоев 106.45, Темиргалиев эса 106.30 натижа натижа қайд этди. Якунда Жонибек Темиргалиев финалга йўл олди.

07:00. Жуи Житсу. Озода Нурматова нимчорак финалда имкониятни бой бериб қўйди. БАА вакиласи – Мухра Махфуд кейинги босқичга йўл олмоқда.