Ханчжоу-2022. Ўзбекистонлик спортчилар бугунги кунни 4 та медаль билан якунлашди

Ханчжоу-2022 ХIХ ёзги Осиё ўйинларининг яна бир кунидан ўрин олган беллашувлар старт олиш арафасида. Бугундан спорт рақси, бадиий гимнастика ва синхрон сузиш дастурларида баҳслар бошланади. Кўпчиликнинг эътибори оғир атлетика бўйича эркаклар ўртасидаги -109 кг вазн тоифасидаги дастурга қаратилиши шубҳасиз. Унда икки Олимпиада чемпионлари Руслан Нурудинов ҳамда Aкбар Жўраев олтин медаль учун рақобат олиб боришади.

06:00. Слаломда эшкак эшиш бўйича ярим финал баҳсларига старт берилди. Каноэ слаломида кечган баҳсда ҳамюртимиз Aнвар Клевлеев 101.49 сония натижа билан финал йўлланмасини қўлга киритди. Ушбу дастурда қатнашган бошқа бир ҳамюртимиз Aлибек Темиргалиевнинг 105.54 натижаси финал учун етарли бўлмади. Финал баҳси бугун Тошкент вақти билам 11:00 да бошланади.

07:15.  Жиу-житсу баҳсларида -77 кг вазн тоифасидаги Умид Сайдуллаев қувайтлик Фаҳад Алмаррийга имкониятни бой берди. Мана шу вазндаги яна бир ҳамюртимиз Ферузбек Ўроқов илк босқичда баҳрайнлик Юсуф Маҳмудни мағлуб этди. Ферузбек кейинги баҳсда саудиялик Абдуллоҳ Алганнамни енгди. Энди Ўрозов чорак финалда БАА спортчиси Маҳди Алаҳлақи билан беллашади.

08:08. Бугундан эркин кураш усталари ҳам баҳсларга киришишди. Ўзбекистон терма жамоаси аъзоларидан Нодиржон Сафаров (-57 кг) илк босқичда ғалаба қозонди. Шунингдек, аёллар кураши дастурида Дилфуза Aимбетова (-62 кг) ҳам биринчи беллашувини муваффақиятли ўтказиб, чорак финалга йўл олишди. Aфсуски, Aббос Раҳмонов (-65 кг) эронлик рақибига имкониятни бой берди. Энди у еронлик курашчи финалгача етиб борган тақдирда бронза медали учун курашиш имконини сақлаб қолади.

08:20. Кураш бўйича баҳсларда 76 кг вазнда ҳамюртимиз Светлана Оқназарова нимчорак финалда қозоғистонлик Жамила Бакбергеновага (0:7) имкониятни бой берди. 68 кг вазндаги вакилимиз Фируза Эсенбаева ҳам шу босқичда япониялик Наруха Матсуюкидан (0:5) енгилди. 

Чорак финалга йўл олган эркин курашчимиз Нодиржон Сафаров чорак финалда япониялик Тошиҳиро Ҳасегавага (2:12) ютқазиб қўйди. Дилфуза Aимбетова КХДРдан келган курашчи Хйонгйонг Мунга (1:12) мағлуб бўлди.

09:20. Жиу-житсу баҳсларида -77 кг вазн тоифасида чорак финалга чиққан Ферузбек Ўроқов БАА спортчиси Маҳди Алаҳлақи билан беллашди. Аммо вакилимиз имкониятни бой бериб қўйди.

09:55. Ўроқов бронза медали учун ўтиш жангида мўғулистонлик Даваадорж Мункхтурга ютқазди. 

09:30. Бугун от спортининг конкур йўналиши бўйича ғолиб ва совриндорлар номи маълум бўлади. Дастлабки саралаш босқичидан сўнг кечки дастурда медаллар учун курашувчи чавандозлар аниқ бўлди.

Унга кўра, Ўзбекистон терма жамоаси аъзоларидан Хуршидбек Aлимжонов (“Chempions ligas” лақабли отда) ҳамда Бекзод Қурбонов (“Santos Xippika”) Тошкент вақти билан 12:00да бошланадиган дастурда совринли ўринлар учун баҳс олиб боради.

11:30. Ўзбекистон делегацияси бугунги кун ҳисобидан илк олтин медалини қўлга киритди. Унга каноэ слаломида эшкак эшиш бўйича Ўзбекистон терма жамоаси аъзоси Aнвар Клевлеев муаллифлик қилди. Ҳамюртимизнинг финалда қайд этган 98.63 сонияли натижасини ҳеч бир рақиб яхшилай олмади ва Клевлеев Осиё ўйинлари чемпионига айланди!

13:00. Анвар Клевлеевдан ҳакамлар олтин медални тортиб олди. Хитойлик спортчидан олиб қўйилган жарима 50 сония қайтарилди. Натижада вакилимиз кумуш медалга лойиқ кўрилди. Лекин биз учун АНВАР ЧЕМПИОН!!!

13:05. Оғир атлетика бўйича эркаклар ўртасида -109 кг вазн тоифасида даст кўтариш машқи якунланди. Ҳозирча, ҳамюртимиз Aкбар Жўраев 189 кг билан биринчи ўринда кетмоқда. 175 кг қайд этган Руслан Нурудинов эса ушбу машқни тўртинчи бўлиб тугатди.

13:30. Оғир атлетика бўйича Ўзбекистон терма жамоаси аъзолари Aкбар Жўраев ва Руслан Нурудинов Осиё ўйинларининг совриндорига айланишди. -109 кг вазн тоифасида иштирок етган Aкбар Жўраев 417 (189+228) кг билан кумуш, Руслан Нурудинов эса 391 (175+216) кг билан бронза медалини қўлга киритди. Мазкур йўналишда ғолиблик силтаб кўтариш ва икки кураш бўйича Осиё ўйинлари рекордини ўрнатган хитойлик спортчига насиб этди. Ҳуанҳуа Лиу 418 (185+233) кг натижа кўрсатди.

14:00. Аёллар футболи мусобақасида бронза медали учун кечган учрашув якунланди. Унда Ўзбекистон терма жамоаси Хитойга қарши баҳс олиб борди ва 0:7 ҳисобида имкониятни бой берди. Шу тариқа, ҳамюртларимиз бронза медалидан маҳрум бўлди.

17:50. Бугундан беллашувларга киришган бадиий гимнастика бўйича Ўзбекистон терма жамоаси аъзолари яккалик дастурида саралаш ва жамоавий йўналиш бўйича финал баҳсларини ўтказишди. Тахмина Икромова, Вилана Савадьян ҳамда Евелина Атальянцдан иборат жамоамиз 324.8 балл жамғаришга эришди. Қувонарлиси, ушбу натижани ҳеч бир жамоа такрорлай олмади ва ҳамюртларимиз жамоавий дастурда олтин медални қўлга киритишди.

Шунингдек, бугунги чиқишлари орқали Тахмина Икромова ҳамда Евелина Атальянц яккалик йўналишида кўпкураш дастурида медаллар учун курашиш имконини сақлаб қолишди.