Хайрулла Ҳамидов: Месси 2022 йилги Қатар мундиалида Марадонага тенглашиш учун эмас, устози хотираси учун ҳам ўйнашига тўғри келади

Кеча футбол афсонаси Диего Марадона вафот этди. Шу муносабат билан таниқли шарҳловчи Хайрулла Ҳамидов телеграмдаги саҳифасида унинг фаолиятига тўхталиб ўтди. 

"Ўлим ҳам асли Аллоҳнинг бир неъмати. Инсон вафот этар экан, унинг бир қисми тугайди ва табиийки, янгиси бошланади. Агар ўлим бўлмаса, давомийлик ва... уёғи биз билмайдиган чексизлик.

Бугун Марадонанинг вафоти билан кўп нарсалар ёзилди, ёзилмоқда, ёзилаверади ҳам. Ростанам даҳо футболчи эди. У билан ўсган авлод айниқса қаттиқ ёзяпти. Бутун бир эпоха тугагани учундир балки. Ёзганлардан ташқари дунё аҳлининг реакциясига ҳам қаранг: Юлдузлар Диегони эслашга тушдилар, Сан Паоло ўйингоҳи номи Марадонага берилиши ҳақидаги хабарлар чиқди, уч кунлик мотам ва ҳоказолар.

Даврон Файзиев: Пеле ва Марадона тарихдаги энг буюк футболчи мавзусида кўп солиштирилади. Натижадан келиб чиқиб, кўпинча Пеле устун қўйилади. Бироқ Пеле битта жиҳатдан Марадонага ета олмайди

Одил Аҳмедов: Тарих Марадонадек ўйинчиларни доим эслаб қолишига шубҳам йўқ. У – дунё футболининг ҳақиқий қироли сифатида қолади

Марадона кеча тирик эди ва у ҳақда бу гаплар йўқ эди. Ўлимнинг неъматлиги - инсон қадрини топади. Бу қадр у вафот топгунга қадар бўлмайди. Оддий ҳол. Бугун Марадона сиймоси бўй-басти билан намоён бўлмоқда. Чунки унинг биринчи қисми тугади. У тугаб, янги қадр босқичига кўтарилди.

Бир авлод севиб улғайган кишисини йўқотганда шундай бўлади доим. Биздан олдингилар Круиффга йиғлашган, жим бўлиб қолишган (Пеле тириклиги учун, албатта), биз бугун Диегонинг вафотига ғамгинмиз. Аслида кечаги Марадонадан бугунги Марадонанинг фарқи бўлмаслиги керак эдику, унинг ўйинларини шунча яхши кўрган бўлишса, ҳар куни гапирмайдиларми, йўқ, вафот санасида бу йиринг мисол ташқарига чиқиб кетади. Одамлар кимни йўқотганларини шунда биладилар.

Авлод ўзи суйган кишисини ота-онаси каби ардоқлагандек туюлади менга. Ота-она қарийди, тирикчилик юкини фарзандларига беради, фақат маслаҳатгўйга айланади. Пул топмайди, бировнинг ишига аралашмайди, баъзан шошганимизда борлари-да эсдан чиқиб қолади. Шундоқ, оддий томошабин мисол яшай бошлайдилар. Лекин ўша, фақат уйда кўрганимизда саломимизга алик оладиган, ишга кетаётганимизда дуо қилиб қўядиган, уйнинг файзи бўлиб турган отамиз ё онамиз вафот этса, даҳшатли туш каби сесканиб кетамиз. Усиз-да умримиз давом этишини билсак-да, катта нарсани йўқотганимизни англаймиз.

Марадона – бизнинг авлод учун ана шундай катта сиймо эди. У футбол ўйнамаётганди, мураббийликни ҳам ташлаганди, умуман футболга аралашмай ҳам қўйганди ҳатто. Лекин бугун унинг футбол ичида яшаётганини билиб қолдик. Бирдан, йўқолиб қолганида, футбол ундан айрилганини пайқаб қолдик. Аслида усиз—да футбол давом этади... Ҳамма яна ўз иши билан машғул. Марадонасиз бугунги футбол умуман ўзгармаслиги-да аниқ. Аммо ўша “қадр босқичи”га ўтилгани учун ҳам Диего номи футбол оламига айланиб кетади.

Криштиану Роналду: Бугун мен дўстим билан, дунё эса даҳо, энг зўрлардан бири, сеҳргар билан хайрлашди

Месси 2022 йилги Қатар мундиалида Марадонага тенглашиш учун эмас, устози хотираси учун ҳам ўйнашига тўғри келади. Туғилганидан то ўлгунигача шоу кўрсатиб яшаган Марадона ҳаётдан кетиб ҳам Аргентинаси учун масъулият меросини ташлаб кетяпти.

Ҳеч нарса тугамайди, балки кейингиси бошланади, деганлари шу бўлса керак..."